Al menos tres persona herida, entre nan un opositor cu a keda den libertad, a laga un manifestacion contra e regimen di Daniel Ortega diasabra pasa den marco di e crisis socio- politico cu Nicaragua ta biba desde 17 luna pasa.
Un di e personanan herida cu a keda den libertad ta e opositor Pedro Estrada, kende a sufri un herida despues cu un bomba di luz y zonido cu agentenan antidisturbio a lansa a cay riba su cabes.
Otro di e personanan lesiona ta un muhe kende a desmaya y otro un homber, ambos sin gravedad.
E hechonan a sosode na entrada di e parkinglot di edificio di Centro Pellas, na centro nobo di Managua, unda centenares di Nicaragueño a concentra pa participa na e marcha denomina ‘Nada ta normal’, convoca pa dos grupo opositor.
Na otro punto di Managua, tambe decenas di opositor a concentra na parkinglot di un edificio di oficinanan y a lansa cantica contra e regimen di Ortega y na fabor di e libertad di e denomina ‘presonan politico’, y husticia pa e victimanan di e protesta.
Unidad Nacional Azul y Blanco y Aliansa Civico pa Husticia y Democracia, dos di e agrupacion opositor mas visibel na Nicaragua, a convoca e manifestacion aki pa reclama e reestablecemento di derechonan constitucional di e pais, cu ta bibando e pio crisis politico den decadanan.
Cu e manifestacion ta exigi ‘e cese di represion y asesinato di campesino, e liberacion di mas di 120 preso politico y e regreso cu garantia di e exiliadonan’, segun un di e dirigentenan, Felix Maradiaga, kende a bolbe di exilio y kende Polis Nacional ta acusa di organisa grupo pa altera e paz na Nicaragua desde cu e crisis a cuminsa, dia 18 di april di 2018.
