Medardo Mairena, lider campesino cu a participa na protestanan contra presidente di Nicaragua, Daniel Ortega, lo paga un condena di 216 aña pa terorismo, robo agrava, daño agrava, secuestro y entorpecimiento di servicio publico.
Edgardo Altamirano, titular di e nuebe Husgado di Distrito Penal di Huicio, a haci e anuncio, y a ordena na e mesun tribunal 210 aña di prizon pa Pedro Mena y 159 pa Orlando Icabalceta, ambos lider campesino, kende hunto cu Mairena, a participa den protesta contra gobierno di Ortega desde 2013.
“E castigonan ta ridiculo, nan ta tres biaha loke e Fiscalia a pidi, cu tabata 73 y 63 aña, aunke e pena maximo na e pais ta di 30 aña”. E abogado defensor, Julio Montenegro a afirma, y ademas a indica cu no a ser cita pa e hues Altamirano pa participa na e audiencia.
E manifestacionnan contra Ortega a alcansa e mas halto punto entre e lunanan di april y juli di aña 2018, practicamente na tur e teritorio Nicaragueño. Pa e motibo aki, gobierno a realisa accionnan violento, cu e Comision Interamericano di Derechonan Humano CIDH a identifica como crimen di ‘lesa humanidad’.
E presidente Daniel Ortega, ken tin 12 aña den poder, no ta acepta responsabilidad den e crisis, como tampoco señalamiento general di abuso cu a ser cometi pa autoridadnan contra e manifestantenan anti gobierno, na momento cu ta haci denuncia di intento di golpi di Estado.
