Por lo menos 102 persona a desaparece despues cu nan a keda deteni pa polis o paramilitar na Nicaragua, pais cu ta den un crisis socio-politico cu a laga mas di 300 morto den ultimo aña.
Den un informe divulga ayera, e Comite Pro Liberacion di Preso Politico a clasifica paradero di 102 persona como “caso pendiente pa confirma”, cu denuncia di “detencion arbitrario, pero di cual nan nos no a logra haya mas informacion.”
Algun di e personanan desapareci a ser mira pa ultimo biaha ora polis o paramilitar a captura nan, y ora di solicita informacion na e wardanan di Polis Nacional agentenan tabata nenga di tin nan datonan.
Otronan tabata keda den e celnan di Polis Nacional di e Sistema Penitenciario Nacional, na momento cu e famianan no tabata haya informacion mas di parti di autoridadnan.
Aunke presidente Ortega a compromete su mes pa libera tur preso politico, e denuncianan ta continua tocante detencion arbitrario y desaparicion.
Comite Pro Liberacion di Preso Politico a divulga un lista riba cual ta aparece e situacion legal di por lo menos 731 manifestante preso, di cualnan 227 ta deteni ainda, 401 a ser laga liber cu condicion di ‘casa por carcel’, 102 desapareci y un a muri siman pasa pa herida di bala den un prizon bao circunstancia ainda no clarifica.
E crisis cu ta afecta Nicaragua desde april 2018 a laga 325 morto, segun Comision Interamericano di Derecho Humano (CIDH). Organismonan local tin registra 593 victima mortal. Gobierno ta reconoce 199.
