Desde cu ministro Oduber a bay cerca Gobernador diaranson siman pasa, y riba mesun dia Prome Ministro Eman a declara cu e lo bay papia cu su ‘colega y amigo di hopi aña’, supuestamente pa clarifica e asunto, no a tende nada mas di ningun tipo di reunion. Si acaso algun encuentro a tuma luga, lo mester conclui anto cu ningun di dos ta desea di divulga esaki. E ora por conclui cu a yega na un acuerdo pa sigui papia, sin duna cuenta na otronan. E posibilidad aki no ta parce asina probabel. Y pakico no? Pasobra no mester lubida cu prome cu ministro Oduber a bay bishita Gobernador, el a tene un encuentro cu Prome Ministro Eman. Aparentemente Oduber a sali man bashi for di e encuentro y a dicidi pa continua cu su cita cu Gobernador, pa informa tocante su decision, segun su version di loke el a bisa o haci durante e encuentro, pasobra manera protocol ta indica, no por papia pafo di loke a ser discuti cu Gobernador. Di e manera aki nos como ciudadano no por sa exactamente kico a keda papia cu Gobernador, y mester conclui cu en todo caso tabata imposibel cu un anuncio legal di retiro a ser entrega, pa e simpel motibo cu no por entrega un retiro condicional, valido pa cualkier lapso di tempo. Si bo anuncia Gobernador cu bo ta bay, ta pasobra bo ta bay awor aki mes… Mester bisa cu contrario na e dianan di welga di hamber, awor si Prome Ministro a mantene su mes na regla y no a divulga nada di loke el a papia cu Gobernador. Of el a siña su les, of e biaha aki ta cumbini su persona mas pa keda keto, of ambos.
En todo caso, si Eman tabata di detene Oduber den su plan pa anuncia su retiro na Gobernador, e por a haci esey ey mes, pero obviamente no a haci’e. Despues cu Oduber a duna su declaracion na prensa dilanti oficina di Gobernador, Prome Ministro a haci loke el a haci y esey ta bisa cu lo bay papia, loke tanto dia despues keto bay no a tuma luga, asina leu cu nos ta na altura. Pregunta ta: kico lo bay pasa seguidamente? Ministro Oduber a laga sa na prensa cu e lo no asisti na conseho di ministro mientras cu su coleganan no atende e asuntonan problematico cu el a trece dilanti.
Manera nos a opina anteriormente, su coleganan lo no tin niun pura pa bay atende su deseonan, si no nan lo a haci’e caba den e reunion di conseho di ministro cu a bay for di man. No mester lubida cu pa varios di e ministronan Otmar Oduber ta nan adversario directo mas importante. E ta maneha e unico cartera den e gobierno aki cu por mustra resultado, aunke no necesariamente un persona mester ta di acuerdo cu su maneho den tur aspecto. Un desaparicion di Oduber for di e gobierno aki por resulta beneficioso pa varios otro colega.
Pero, concretamente, kico e ausencia di ministro Oduber den conseho di ministro tin como consecuencia legal? En principio, Prome Ministro por tuma su ausencia como un señal cu e no ta aprecia mas di ta ministro y por pasa na firma un Decreto unda ta duna e ministro su retiro. Esey ta bay sucede? Probablemente no, pasobra esey ta trece hopi turbulencia cu por ta desfaborabel pa e gabinete, cu tin basta problema pa atende caba. E otro opcion ta pa bay parlamento y laga fraccion di gobierno trece un mocion di desconfiansa contra e ministro. Esaki tambe por trece turbulencia no desea cun’e y lo no ser uza inmediatamente. Otro opcion ta un ‘reshuffle’ di e gabinete cu un reparticion di cartera diferente, cu ta laga e ministro en cuestion sin cartera, lagando e caminda habri pa e mes pa e tuma su retiro of no.
Si lo haci uzo di cualkier di e posibilidadnan aki, ta keda dificil pa bisa, ya cu cada un tin su repercusion y lo ta importante pa purba anticipa kico lo sucede si scoge pa un cierto paso. Mas probabel ta cu lo ta bay tin un encuentro si entre e dos ministronan, aunke lo ta solamente ‘pro forma’. Esaki pasobra si pasa hopi tempo y ningun di e partidonan ta move den direccion di entama un reunion, ta bira obvio cu e reunion ey no tin pakico di tuma luga mas tampoco. E ora e pregunta di prensa na Prome Ministro lo mester ta pakico e no ta duna e ministro su retiro, si acaso e tin curashi pa haci esey. Na ministro Oduber e pregunta lo ta pakico e no ta saca su conclusion for di e silencio di e otro banda, cu aparentemente no tin intencion di drecha e asunto.
Contal cu nos por bisa cu e silencio di dos banda ta mes significativo cu si nan a papia formalmente, sin yega na un solucion. Un poco mas pasenshi y nos lo haya sa kico ta bay pasa proximamente.
