No a duna ningun tereno pa produccion di cannabis. Esey ta e contesta cu Bon Dia Aruba a ricibi for di despacho di Minister Demisionario di Infrastructura y Prome Minister Evelyn Wever Croes.
A haci e Minister encarga cu infrastructura e pregunta aki, despues cu Minister di Salud Publico, Dangui Oduber a bisa di no sa nada di Vertical Designs Aruba pero cu en todo caso, e no a duna ningun permiso pa produccion di cannabis, mirando cu ainda e ley no a pasa Parlamento.
Sinembargo, e informacion publica pa Affinor Growers, un compania publico di Canada, ta papia cu a sera un ‘binding letter of intent’ cu Vertical Designs Aruba, VDA, pa traspaso di tur accion y e tereno di 40 hectaria cu VDA a haya pa produccion di fruta, berdura y eventualmente cannabis. Den e relato, Affinor ta bisa cu e acuerdo ta mara na e licensia pa produci y exporta cannabis. Den otro palabra, Affinor tambe ta pendiente pa VDA haya e licensia. E registro di Camara di Comercio ta mustra cu VDA a keda estableci na 2018 pa produci fruta, berdura y cannabis pa exportacion.
Locual Minister Oduber a bisa cu e no a duna ningun permiso pa cannabis, pero no a duna claridad riba e tereno cu VDA lo a haya. E relato di Affinor ta papia di un tereno na e parti noord di Aruba,
Bon Dia Aruba a acerca tanto oficina di Minister Presidente Evelyn Wever Croes como Director di DIP (un biaha mas) cu e preguntanan si VDA berdad a haya 40 hectaria pa produccion di fruta, berdura y cannabis, unda e tereno ta ubica, si VDA a produci un businessplan pa hustica e tereno grandi aki, y si a traspasa e tereno? Y finalmente si ta permiti pa e compania bende su accionnan sin mas, cu ta inclui e tereno.
E contesta di despacho di Prome Minister tabata similar na locual Minister Dangui Oduber a bisa. Esta cu ningun hende ni compania a haya tereno pa cultivo di cannabis. E ley ta na Parlamento. Tin hopi interesado cu a participa na e destaho publico pero “ningun decision a wordo tuma ainda.”
Sinembargo, e pregunta di Bon Dia Aruba no tabata riba produccion di cannabis, sino, si a pasa un tereno pa VDA y si locual Affinor Growers a publica ta incorrecto y ta basa riba informacion falso. Riba e pregunta aki a bolbe haya e mesun contesta: “Ningun tereno a wordo duna pa cannabis y ningun permiso a wordo duna pa cannabis.” No a ricibi ningun contesta di Director di DIP dr. Haime Croes.
Obviamente, e contesta no tabata riba e pregunta cu a haci, pasobra for di principio a mustra caba cu no por a duna permiso pa cannabis pasobra e ley no a pasa. Locual no a contesta, ta, si Affinor a publica un informacion falso of si berdad VDA a haya tereno cu awor ta den negociacion pa traspasa pa e compania Canades.
