Ni gobierno ni sindicato… Kier regla salario den ley…?

Hopi discusion despues di e sentencia den e caso di sindicatonan SIWA y VWI contra WEB Aruba N.V. tocante e reduccion di salario cu 12,6% pa pasa na gobierno como aporte na e proyecto di ayudo financiero na desempleado. Huez ta haya ta razonable cu den e actual crisis gobierno mester por obliga personal di e empresanan estatal pa nan tambe aporta na e fondonan necesario pa combati e gastonan di medida di emergencia cu gobierno mester a tuma. Gobierno lo ta mara na e acuerdo cu Hulanda, unda ta ricibi recurso pa cubri otro parti di e medidanan, en particular e subsidio di salario y e aportacion na empresa mediano y chikito. Tur esaki ta parce algo logico; pa hopi di nos sobrevivi den e pandemia aki ta hustifica cu ta tuma medida drastico pa logra cu nos ta haya recurso, tambe si esey ta implica cu nos mester haci cos cu normalmente no ta haci. Y kico asina ta e cosnan cu ta haci cu normalmente no ta haci, y si acaso nos hacie toch, pero a hacie diferente, anto no tabatin mester sentencia di huez mes?

Den e caso presenta na corte ta trata di un asunto, cu na promer lugar ta toca gerencia y empleadonan di un NV. Un NV estatal porcierto, pero en todo caso un sociedad anonimo, un persona legal riba su mes, pa cual ta existi henter un volumen separa den nos Codigo Civil. Esaki enberdad a haya un renobacion recientemente, pero aki nos ta papiando di e cosnan fundamental pa cualkier compania. E persona huridico riba su mes aki, y aki no ta importa cu e accionista, unico o principal ta Pais Aruba o cualkier otro, den e caso aki a dicidi cu e empleadonan di e compania mester contribui cu un proyecto di Pais Aruba, pa recauda fondo pa yuda otro persona den comunidad cu a perde empleo. Un meta noble porcierto, pero esey no ta e discusion. Loke ta discuti aki, y den corte, ta si e accionista unico o principal por drenta den seno di e persona legal di e manera aki, exigiendo entrega di cierto fondo di e gerencia, y ordenando cu lo mester ignora e contrato colectivo (CAO) cu e persona legal tin cu su empleadonan, pa yega na e meta (noble) aki. Normalmente esey lo ta un caso bastante simple pa un huez: un acionista, tambe ora ta trata di gobierno, no por actua di e manera aki dentro di e persona legal, obligando e director(nan) ignora e contrato colectivo cu e empleadonan. Kico ta haci e caso aki diferente cu aki si ta considera cu Pais Aruba por ‘hinca man den caha’ di e empresa, a pesar cu ta trata, manera a bisa caba, pa un causa ‘noble’?

Den e caso den corte, Utilities NV, accionista unico di WEB, a argumenta cu tabata importante pa cumpli cu e exigencianan Hulandes, pasobra si e apoyo di liquidez no continua, anto e incumplimento di e usuarionan di WEB lo ta un menaza pa continuacion di operacion di e empresa. Huez a dicidi cu e peso di e interes general tabata mas importante cu e interesnan di e empleadonan representa pa e sindicato. Esaki ta implica cu gobierno (Pais Aruba) a gana y e sindicato y empleadonan no tin un caso den apelacion? No sin mas, ta parce nos. Ta trata aki di un asunto unda interes general en berdad ta hunga un papel importante, y cu ta obliga gobierno haci cos extraordinario. Pero, pakico no a haci mescos cu na Corsou unda gobierno a dicidi di cana e caminda di un ley (landsverordening), hustamente pa atende e situacion particular aki di su posicion como accionista unico di e companianan estatal, mescos aki Utilities NV y Pais Aruba ta den e posicion ey? Kico por ta e motibo cu no a opta pa e ruta aki, cu lo a duna hopi mas claridad den e asunto?

E contesta por ta cu no tabatin voluntad pa defini tur cos bon cla, pasobra e ora mester a defini tur cos bon cla. Nos ta referi aki na e asunto di e ‘Wever-Croesnorm’ cu mester bay percura cu ningun funcionario di entidad estatal ta gana mas cu 130% di e salario di promer ministro. Aparentemente gobierno a scoge pa no ‘rock the boat’ pa esnan cu actualmente ta gana mas cu esey. A scoge pa solamente formula e contratonan nobo dentro di e norma aki, manera e caso di e director nobo di Elmar NV. Pregunta cu ta surgi ta cu por aparece anomalia dentro di un entidad estatal o semi-estatal, unda personal subordina na esun cu e norma nobo, ta gana mas cu nan hefe… Esaki no ta un situacion sano, ademas cu lo bay dura hopi aña promer cu regularisa e situacion di salario den e entidadnan aki. Fuera di esey tin e caso di e entidadnan cu no ta cumpli, no pasobra nan no por, pero pasobra…?

Mustra solidaridad ta un bon causa, pero ban regla e asuntonan aki manera mester ta. E problema cu ta pidi un solucion drastico ta e abuso di nivel di salario den e entidadnan estatal, cu no ta toca solamente e directornan. Nos no ta mira un maneho cla, y esey por ta conveniencia di tanto gobierno como sindicato…