Procurador General di New York ta demandando Amazon riba protocolnan di seguridad pa Covid-19, acusando e compania di ta mas preocupa pa traha placa cu pa protege su empleadonan contra e malesa.
E demanda, entrega diamars laat, ta involucra dos facilidad di Amazon na ciudad di New York cu ta duna empleo na mas di cinco mil trahado. Ta acusa Amazon di faya di desinfecta e facilidadnan aki despues cu empleadonan enfermo tabata presente; no a tuma contacto cu trahadonan na momento cu nan tabata expuesto na e virus; y a forsa empleadonan traha asina hopi cu nan no tabatin tempo pa desinfecta nan stacion di trabao ni mantene distancia social.
“Mientras Amazon y su CEO a gana biyones durante e crisis aki, empleadonan cu ta traha duro a ser forsa pa sufri den condicionnan insigur”, Procurador General di New York, Letitia James a bisa, kende a entrega e demnda.
E demanda a yega apenas algun dia despues cu Amazon preventivamente a demanda pa blokea esaki di tuma luga. Den su propio demanda entrega diabierna, Amazon a bisa cu inspeccionnan no anuncia di oficina di sheriff di e ciudad a haya cu su warehouse na New York a cumpli cu rekisitonan di seguridad. Diaranson, vocero di Amazon, Kelly Nantel a agrega cu e demanda di Procurador General no ta presenta un bista corecto di e respuesta di Amazon pa cu e virus.
E pandemia a expone con Amazon, e segundo dunado di trabao priva mas grandi di e pais, ta trata su trahadonan cu ta paketa y envia orden. Algun a protesta un falta di tapaboca y ekipo protectivo, mientras otronan a bisa cu e compania no ta transparente tocante con hopi hende a bira malo. Na un warehouse na Alabama, casi 6mil trahado ta votando riba si nan kier join un sindicato, e accion sindical mas grandi den historia di Amazon. Entre e solicitudnan di organisadornan di sindicato pa Amazon, cu su ganashi y revenue a aumenta drasticamente durante e pandemia, trata su trahadonan cu respet y duna nan mas break.
E hecho cu no tin suficiente break tambe a ser treci dilanti den e demanda. A bisa cu Amazon ta monitor trahadonan constantemente, y cu esnan cu no ta trahando na tur momento por haya problema of haya retiro. Esaki a ocasiona cu trahadonan ta pura pa caba break y no ta tuma tempo pa laba man, haci nan stacion di trabao limpi, of tene distancia social, segun e demanda.
Ademas di potencialmente expone trahadonan na e virus, e demanda tambe a bisa cu Amazon ilegalmente a tuma represalia contra trahadonan cu a papia tocante condicionnan di seguridad pober na su facilidadnan.
Un di e trahadonan aki, Christian Smalls, a haya retiro di Amazon na maart despues cu el a dirigi un protesta na e bodega na Staten Island. Amazon a bisa cu a retira Smalls pasobra el a viola guia di distancia social. Pero e demanda ta bisa cu Smalls nunca a drenta e facilidad durante e protesta, y e compania nunca a bis’e pa bandona e parking lot unda e protesta a tuma luga. A bisa cu dos trahado di Recursonan Humano na Amazon a bay di acuerdo por escrito cu no mester a duna Smalls su retiro.
E retiro tabatin un efecto friu riba otronan, e demanda ta bisa, cu trahadonan di Amazon cu miedo cu nan tambe por bira victima di represalia si nan haci cualkier keho di salud of seguridad.
Den e demanda, James ta pidi e corte pa forsa Amazon.com Inc., basa na Seattle, pa ofrece Smalls su trabao back y pag’e pa daño emocional, como tambe otro dañonan. Tambe ta pidi corte pa sigura cu Amazon ta protegiendo salud di su trahadonan door di monitor e compania y forsando esaki pa cambia su politicanan.
