(AP) —Un pueblo na New Jersey unda casonan di cancer infantil a aumenta ta purba di apela contra un areglo entre e estado y e sucesor di e compania cu a laga desperdicio toxico den e awa y tera pa varios decada, resultando cu varios parti di e comunidad a bira un sitio di desperdicio contamina.
Toms River y e grupo ambiental Save Barnegat Bay ta lantando un caso den corte di apelacion di New Jersey pa apela e aregla entre e estado y compania di kimica Aleman, BASF, pa decadanan di daño ambiental den y rond di e ex-planta di kimico di Ciba-Ceigy. E localidad ta keda un di e sitionan mas contamina na Merca.
BASF ta e sucesor corporativo di Ciba-Ceigy.
E pueblo y e grupo a yama e areglo “increiblemente inadecua”, bisando cu proyectonan pa restauracion mester ser conduci den henter Toms River y comunidadnan cercano. Aunke esaki ta birando mas chikito, e awa contamina ta keda bao tera den partinan di Toms River, y autoridadnan federal no por duna un calculacion di ki ora e limpiesa, cual a cuminsa den añanan 1990, lo ser completa.
E apelacion a ser entrega dia 28 di september y anuncia pa e demandantenan diamars anochi. E areglo cu BSAF ta inclui un pago di 500.000 dollar cash di e compania, ta agrega un otro 202.343 meter cuadra di tereno controla pa e compania na un conservacion y plan pa acceso publico, y ta obliga BASF pa mantene nuebe proyecto di restauracion pa 20 aña. E compania tambe mester restaura areanan di yerbe y plasnan, y construi un centro di educacion ambiental, entre otro.
Ciba-Geicy Chemical Corp. a benta kimica den e Toms River y e Ocean Atlantico, y a dera 47.000 drum di desperdicio toxico den tera. Esaki a causa awa contamina cu mester door di e sitio den barionan residencial. E departamento di salud di New Jersey a descubri cu 87 mucha na Toms River a ser diagnostica cu cancer for di 1979 pa 1995. Un estudio a determina cu e gradonan di cancer infantil y leukemia den mucha muhenan na Toms River “tabata significantemente eleva compara cu otro estado.”
