Ayera gerencia di New India Assurance a firma un contracto colectivo (CAO) nobo cu sindicato STA cu ta representa e 25 trahando na servicio di e compania aki. Den e documento aki e trahadonan a bay dilanti den  nan salario y ademas den otro beneficionan secundario. E aumento di salario ta depende di un evaluacion di e trahado su desempeño.

Presidente di STA Diego de Cuba, y manager director di e compania di seguro, Kaveri Raghunath a papia riba e beneficionan di e  CAO nobo cu tin un duracion di  3 aña.  E sindicalista a destaca cu e proceso di negociacion a cana bon y nan ta contento cu e bon ambiente laboral aki. “E ingredientenan cu e CAO aki tin den dje ta hopi bon” y balansa.”E ta contene un bono di fin di aña , vakantieuitkering di un luna y dianan liber cu pago dependiendo di kico e ta, cu pa STA ta ingredientenan cu ta un plus masha grandi mes, ya cu hopi compania na Aruba nan trahadonan no ta gosa di e tipo di beneficionan aki.

Ademas el a indica e importancia cu un CAO tin pa un compania, ya cu den dje ta para “e reglanan di wega” poni den un documento unda tanto e compania como e trahadonan mester mantene na dje. Sindicalista De Cuba ta haya cu e punto di aumento di salario a base di evaluacion di e trahadonan ta hopi importante ya cu “berdaderamente bo ta mira cu tin hendenan cu ta haci mas esfuerso den trabou”. E ta spera cu pa medio di e firma di e CAO nobo aki, paz laboral por sigui reina den New India Inssurance, manera a yega di reina durante e ultimo 3 añanan.

New India Assurance
Di otro banda, sra. Raghunath a expresa cu di parti di nan compania nan ta hopi contento di por a firma un CAO nobo pa e trahadonan y sindicato STA cu ta representa nan. E tabata un proceso cu a cana bon y rapido. “E tabata un proceso alegre y asina nos kier pa keda di awor den adelante.” Tambe el a indica  cu e firma di e CAO ta un motivacion pa  nan trahadonan, y  gerencia di e compania di seguro aki ta kere cu esaki ta e manera mas “bon” pa por haci esaki.

Peticion auto sin seguro
Sra. Raghunath si ta haci un suplica na gobierno y departamento di Trafico specifico pa atende e problema di hopi auto cu ta coriendo sin nan seguro na ordo; pa  asina e automobilistanan por bira mas consciente. Encuanto e desaroyo di benta di polisa di seguro,  el a bisa cu nan ta un compania cu ta keda crece y esaki ta crece stabilidad pa nan trahadonan, ya cu nan no ta baha den empleado sino mas bien subi den empleado.

P’esey e reapertura di e refineria New India Assurance ta mir’e como un oportunidad pa sigui crece y nan ta wak esaki como algo sigur beneficioso como compania di seguro.  Ya caba nan tin contacto cu e persona cu ta encarga cu e parti di seguronan . “Nos ta den deliberacion cu nan y seguramente nos t’ey semper pa nan.”