(AP) – Pa Dr. Jeremy Faust, e momento cu el a realisa e pandemia no ta domina su dia na trabao a bini ora cu el a ripara cu pa dos turno largo den eerste hulp na Brigham and Women’s Hospital na Boston no tabatin ni un caso nobo di coronavirus.

Kerry LaBarbera, un enfermero di un centro medico den e mesun area di Boston tambe experiencia un realisacion similar den e mesun weekend cu Faust, unda cu solamente dos pashent cu COVID-19 a drenta su unidad di emergencia, cual ta un di esun nan mas druk den New England.

“E aña aki a sinti manera cu nos tabata pasando den un tormenta of algo teribel” el a bisa, “bo ta luchando duro pa por sobrevivi, y diripiente tur cos ta pasa y bo ta pensa ‘kiko a caba di pasa?’”. Masachussetts y e resto di New England, cual ta e region mas vacuna di U.S, ta dunando e resto di e pais un bista di un futuro posibel si e resto di e ciudadanonan vacuna.

Casonan di COVID-19, hospitalisacion nan y mortonan den e region ta bahando constantemente den bista cu 60% di e ciudadanonan a ricibi por lo menos 1 di e dosis nan di e vacuna. Alabama, Missisippi y Louisiana den comparacion cu New England tin por lo menos 35% so vacuna, y e casonan compara cu e populacion ta bastante halto compara cu mayoria di e partinan di New England. Nationalmente, mas o menos 50% di e ciudadanonan a ricibi nan prome dosis di vacuna.

Den Massachusetts, oficialnan di salud a determina siman pasa cu ningun di e estado su ciudadnan ni pueblo ta den riesgo di plama COVID-19 pa prome biaha desde cu nan a cuminsa haci control nan regular den augustus aña pasa.

Rhode Island su hospitalisacion nan pa cu coronavirus a yega na e nival mas abao den 8 luna. New Hampshire tin un averahe di 1 morto pa siman despues di a yega na un cantidad di 12 morto pa dia durante e ola mas recien di e virus. Vermont, e estado mas vacuna di U.S cu mas di 70% vacuna cu por lo menos e prome dosis, a bay mas cu 2 siman sin ningun reportahe di morto pa causa di coronavirus.

“E ta un cambio drastico durante un periodo cortico di tempo” Dr. Tim Lahey, un experto den enfermedadnan contagioso na University Of Vermont MEdical Center na Burlington a bisa.

E expertonan di salud publico ta comenta cu e resto di e pais por tuma algun conseho y ehempel di New England mientras cu president Joe Biden ta urgi pa tin por lo menos un 70% di e ciudadanonan di U.S cu e prome dosis di e vacuna, uzando promesa nan di cerbes gratis y algun otro premionan cu por gana.

Un cos cu e region aparentemente a haci bon ta; poco poco aumenta e grupo di personanan eligibel pa tuma e vacuna. Nan a enfoca riba e grupo mas vulnerabel na e vacuna, y a concentra riba vacuna e cantidad mas grandi posibel di e grupo aki, si no tur. Dr. Thomas Frieden, ex-director di Centers for Disease and Prevention bao direction di ex-president Barack Obama.

New England su lidernan tambe a acepta y implementa e consehonan cu nan a ricibi di expertonan di salud publico tocante prioridadnan economico durante e pandemia, Dr. Albert Ko a bisa, ken ta encarga di e departamento di epidemia na Yale School of Public Health na New Haven, Connecticut.

E partinan cu a ricibi e golpinan mas fuerte den e comienso di e brote a hunga un rol hopi importante. “Nos a pasa den momentonan hopi dificil den comienso” Ko a bisa. “Esaki a laga un marca den full e populacion den general.”

E mehoramento den casonan di coronavirus tambe ta bin pa motibo cu e cambio den clima, haciendo e tempo mas caluroso ta haci cu e hendenan por distancia socialmente pafo mas frecuente, expertonan ta bisa. Estadonan manera California y Nebraska tambe ta haciendo un gran trabao, si no miho cu New England den termino di caso nan nobo pa e cantidad di populacion.

“Si bo ta biba den un estado unda cu e cantidad di personanan vacuna ta uno halto, bo trabao no a caba ainda.” Dr. Ashish Jha ta publica riba e red social “Twitter”, agregando “paso rond di Merca tin demasiado hende y comunidadnan unda cu e vacuna no ta accesibel y te ainda nan no por ricibi nan prome dosis di vacuna.”

Den full e nacion, e casonan nobo di coronavirus a baha te un averahe di 15,000 pa dia, mientras cu mortonan a baha te cu 430 pa dia, cantidadnan cu no a wak desde maart 2020, cual tabata e comienso di e crisis. E cantidad di morto general pa U.S ta di 600,000.

Aunke e casonan a baha dramaticamente, hospitalnan den New England ta mas druk cu nunca, pa motibo cu awo cu e casonan y e brote di coronavirus ta asina abao, nan por continua cu e tratonan medico tanto pashent mester a pospone pa motibo di e pandemia.