Netflix a agrega 16 miyon suscrito rond mundo durante e prome tres luna di aña, yudando su status como un di e servicionan mas esencial di mundo durante tempo di isolacion of crisis.
E kwartaal a encera e cuminsamento di orden di keda cas na Merca y rond mundo, un respuesta na pandemia di coronavirus cu aparentemente a conduci na miyones di persona suscribiendo na Netflix pa entretenimento y comfort na momento cu mayoria no tabatin luga pa bay sino cas.
Netflix a mas cu duplica e crecemento per kwartaal cu a predeci na januari, prome cu e brote di COVID-19 a cuminsa cera hopi economianan mayor. Tabata e ganashi di tres luna mas grandi den e historia di 13 aña di servicio di streaming Netflix.
E cifranan — revela diamars como parti di e reporte di prome kwartaal di Netflix — ta sostene un creencia creciente cu streaming di video probablemente lo prospera hasta na momento cu economia general Mericano ta cay den su prome recesion den mas cu un decada.
“Nos ta bon na altura cu nos ta afortuna pa tin un servicio cu tin hopi nificacion pa hende cera na cas, y cu nos por opera remotamente cu minimo interupcion”, Netflix a bisa den un declaracion.
Optimismo di inversionistanan tocante e prospectonan di Netflix a impulsa e stock di e compania na halturanan nobo recientemente, un contraste skerpi cu e decenso di e mercado general.
Maske ta enfrenta hopi competencia, Netflix ta parce di ta miho posiciona pa saca bentaha di e demanda creciente pa pelicula y show di television principalmente pasobra e tin un bentaha di cuminsamento den streaming di video.
Desde cu a cuminsa su programacion original shete aña pasa, Netflix a construi un catalog profundo cu por alimenta apetito di audiencia maske e respuesta di pandemia a shut down produccion di hopi show nobo.
E shut down aki lo por daña Netflix tambe, maske analistanan na Canaccord Genuity ta kere cu su biblioteca di video lo sirbi suficiente contenido pa tene mayoria di competencia leu.
Un excepcion notabel ta Walt Disney Co., cu su recien lansa servicio di streaming tambe ta yen di clasiconan historico, specialmente pa muchanan cu tin mas tempo liber cu usual.
Esey ta un di e motibonan mas grandi cu e servicio di Disney a amasa mas di 50 miyon suscrito y pakico Netflix ta hayando un resurgencia den popularidad. Netflix a predeci cu lo agrega 7.5 miyon suscrito for di april te cu juni. Esey ta casi tres biaha mas cu su averahe na spring di 2.7 suscrito durante e ultimo shete aña.
Durante ultimo aña, crecemento di Netflix na Merca y Canada a reduci considerablemente. Pero e pandemia a parce di reverti e tendencia aki temporalmente. Netflix a agrega 2.3 miyon suscrito na Merca y Canada den prome kwartaal, un aumento di e 1.9 miyon na mes momento aña pasa.
