(AP)—Israel lo continua cu su guera contra Hamas te cu yega na un victoria y no lo ser para pa ningun hende, incluyendo e corte mundial, segun prome minister Benjamin Netanyahu a bisa den un discurso desafiante diasabra, mientras cu e bataya na Gaza ta yega su di 100 dia.
Netanyahu a papia despues cu e Corte Internacional di Husticia na De Haag a tene dos dia di audiencia riba e acusacion di Sur Africa cu Israel ta cometiendo genocidio contra e Palestinonan, un carga cu Israel a rechasa como hipocritico. Sur Africa a pidi corte pa ordena Israel pa para su ofensanan di aereo y di tera den un stap interino.
“Ningun hende lo para nos, no Den Haag, no e as di maldad of ningun hende mas,” segun Netanyahu a bisa den remarcanan graba diasabra anochi, referiendo na Iran y su aliadonan militante.
Ta anticipa cu e caso den corte mundial lo cana pa varios aña. Pero un huicio riba stapnan interino por bin dentro di algun siman. Huicionan di corte ta vinculante pero dificil pa implementa. Netanyahu a haci su mes claro cu Israel lo ignora ordennan pa para e pelea, posiblemente expandiendo su isolacion.
Israel tin basta tempo bao presion internacional pa caba cu e guera, cual a mata mas cu 23,000 Palestino na Gaza y a resulta den sufrimento den e enclavenan ataca, pero te awo a ser apoya pa Merca. Israel ta argumenta cu si nan para e guera, esaki lo nifica victoria pa Hamas, e grupo militante Islamico cu tin dominio riba Gaza desde 2007.
Preocupacionnan di conflagracionnan mas grandi a keda aumenta desde e comienso di e guera. Mas gruponan apoya pa Iran a uni pa lucha pa Palestina, entre otro e rebeldenan di Houthi na Yemen, Hezbollah na Lebanon y militantenan na Irak y Siria—cual a lansa varios atake. Desde e comienso, Merca a aumenta presencia militar den e region pa preveni escalacion.
Siguiendo un campaña Houthi di atakenan misil y drone riba barconan comercial den e Lama Cora, Merca y Britania a lansa varios atake aereo contra e rebeldenan diabierna, y Merca a dal un otro sitio diasabra.
Den mas destruccion di e guera, e corte mundial a tende e kehonan di Sur Africa contra Israel e siman cu a pasa. Sur Africa a cita e conteo di morto y sufrimento entre civilnan na Gaza, hunto cu comentarionan inflamatorio for di lidernan Israeli presenta, como prueba di loke e ta yama ta un intento pa comete genocidio.
Den contra-argumentonan duna diabierna, Israel a puntra pa e caso ser rechasa debi cu no tin fondo. E defensa di Israel a argumenta cu e pais tin e derecho pa bringa back contra un enemigo cruel, cu Sur Africa apenas a menciona Hamas, y cu el a ignora kico Israel ta considera intentonan pa mitiga daño na civilnan.
Mientras tanto, Netanyahu y su hefe di ehercito, Herzl Halevi, a bisa cu nan no tin plan pa permiti e regreso di Palestinonan na e parti nort di Gaza, cual ta e enfoke principal di Israel su ofensanan. Bringamento den e mita norte a reduci, cu forsanan Israeli enfocando riba e ciudad pazuid di Khan Younis, aunke combate ta sigui den algun parti panort.
Netanyahu a bisa cu e asunto a ser treci dilanti pa secretario di estado Mericano Antony Blinken durante su bishitanan siman pasa. E lider Israeli a bisa cu el a conta Blinken cu “e no lo debolbe residentenan (na nan cas) unda ainda tin bringamento.”
Na Gaza, unda Hamas a pone un resistencia na e campaña di atake di Israel, e guera a sigui sin para. E Ministerio di salud na Gaza a bisa diasabra cu 135 Palestino a ser asesina durante e ultimo 24 ora, cual ta trece e conteo di morto di e guera na 23,843. E conteo no ta diferencia entre combatante y civil, pero e ministerio a bisa cu aproximadamente dos tercer di e mortonan ta hende muhe y muchanan. E ministerio a bisa cu e cantidad total di victimanan herida a surpasa 60,000.
Siguiendo un atake aereo di Israel diasabra anochi, un video provee pa e departamento di defensa civil di Gaza a mustra trahadonan di rescate buscando victima den rommel di un edificio na Gaza uzando flash light. E video a mustra nan cargando un mucha muhe tapa cu clechi y herida na su cara, y al menos dos mucha cu tabata parce morto. Un mucha homber, yena cu tera na curpa, a ser pone den ambulance.
E atake riba e cas den e bario di Daraj a mata al menos 20 hende, segun vocero pa defensa civil, Mahmoud Basal. Israel a argumenta cu Hamas ta responsabel pa e casualidadnan halto di civil, bisando cu su peleadonan ta uza edificionan civil y ta lansa atakenan for di areanan hopi pobla.
