Of e tabata presente tur tempo caba?

Un di e parlamentarionan di e partido gubernamental saliente a haci un expresion cu a capta nos atencion. El a remarca cu e ta preocupa pa posibel acto di nepotismo di esunnan cu, muy probablemente, lo tuma e timon di pais Aruba na nan encargo pronto.
E prome reaccion lo mester ta di un sonrisa grandi, sabiendo cu por ta pa prome biaha un politico local ta admiti cu ta existi algo manera nepotismo y cu e no ta algo positivo. Lo ta bon pa splica en corto si, kico ta nepotismo. Nepotismo ta e fenomeno di faborece famia y amigo cerca di esunnan den poder y esey den diferente forma, cu nos tur conoce. Por ehemplo duna nan puesto den gobernacion cu nan normalmente no por haya, pasobra nan no tin e cualificacion necesario, di educacion, experiencia, etc. Otro forma ta percura pa amigo y famia haya proyecto pa ehecuta cu cual nan por gana placa. Si ta palabra prijs cu ta exagera, pa despues por parti e beneficio entre nan, miho ainda.

Nepotismo tin hopi di haci cu patronahe politico, den sentido cu den ambos caso ta trata di faborece hende cu ta cerca di e politico pa nan lealtad, cu e mester compensa tambe. Den Papiamento moderno y masha cla mes, nos ta yama esey friends & family y por cierto e termino aki a surgi den tempo cu e partido geel tabata na mando entre 2001 y 2009. Y ta netamente di e otro banda e critica tabata bin awor di ‘Aruba tene cuidao, friends & family ta den gobierno atrobe.’ Si asina e estimado parlamentario tabata kier a adverti nos pa e peligro inminente, naturalmente nos lo gradicie pa su generoso gesto y sigur nos lo paga bon tino si den e cuatro añanan cu ta bin nos no haya nos confronta cu caso di nepotismo, o friends & family.

Naturalmente nos lo corda riba e experiencia di pasado, pero lo no ta straño pa nos salta e periodo 2009 – 2017, unda e estimado parlamentario tabata den e organo mas halto di nos pais pa controla nos gobernantenan? Por ta cu ta nos ta ekiboca y cu berdad durante e añanan ey no tabatin nada di nepotismo, o den lenguahe popular, nada di friends & family? Laga nos haci un compilacion (recuento) chikito di kico nos a mira sucede den e ocho añanan aki, cu e contrincantenan, e enemigonan grandi di friends & family tabata na mando. Pa cuminsa, nan a pone nos comunidad paga pa un grupo grandi gosa di salario grandi y otro privilegio, como coordinador, assistent o con bo kier yama nan, di e ministronan. Un chasco cu e aña aki ainda ta costa nos 31 miyon florin, cu mas di 300 hende cu awor lo mester busca otro cos di haci, si acaso nan ministronan no a logra hinca nan den e aparato gubernamental caba, pa nan por gosa di un bon salario di awor te cu nan bay cu pension.

Nos por bay investiga tambe cuanto compania o empresario cu ta conoci como simpatisante di e otro partido grandi, o no ta conoci en todo caso como di e color corecto pa e temporada ey, a logra haya un proyecto, o a gana un destaho publico, si acaso tabatin destaho mes. Nos sa di compania cu no ta mete den politica, cu a haya oferta pa entrega cierto servicio o mercancia na gobierno, pero esey tabata na momento cu situacion financiero tabata asina malo, cu esunnan leal na partido mes no tabatin mucho gana mas pa entrega servicio na gobierno, pa e miedo cu nan lo no haya nan pago. E ora no mas tabata haci intento di habri canal comercial nobo, pero ya caba cu e reputacion di mal pagado, algo cu durante henter nos existencia como pais autonomo ta persigui nos gobiernonan, sin excepcion.

E pregunta grandi cu a keda despues di e advertencia di e ex parlamentario ta: pakico e no a bisa nada nunca di e abusonan grandi cu tabata sucede den e gobierno cu e tabata apoya. Curashi bo tin ora bo ta ataca bo contrincante politico. Noblesa ta ora bo ta critica bo mes hendenan pa e mesun abuso cu ta costa pueblo placa. Y mas ainda si hustamente den e periodo di gobernacion cu a caba di conclui, nos a experimenta e patronahe, nepotismo, o friends & family mas sin escrupulo cu nos pais a conoce.

Pero laga nos tuma e parti bon di su advertencia. Loke a sucede por sucede atrobe, a menos cu por fin nos laga nos miedo un banda y critica e cosnan cu no ta bay bon. No laga pasa atrobe loke den e dianan aki nos ta mira di tur banda, cu diripiente tur hende tin algo di keha, cu nan por a keha tanto aña pasa caba, pero nunca a hacie. Nos ta sigur cu esunnan cu ta keha awor cu e caya den nan bario ta na werki, sa cu esey no a sucede diripiente den marduga di 23 di september. No cu esey ta haci diferencia pa e gobierno nobo, desde awor ta nan responsabilidad.