Den luna di februari polis a detene algun sospechoso na Wayaca cu no tabata tin mucho bon intencion. Aparentemente nan tabata den accion cla pa horta den cas di hende. Cu ayudo di algun bisiña cu ta den un groupchat di WhatsApp, a logra detene e sospechosonan aki. E metodo aki pa preveni y combati criminalidad ta algo cu segun cuerpo policial KPA ta hayando un bida di su mes anto ta ‘sumamente’ efectivo. Cuerpo policial ta keda conseha pueblo via diferente charla pa studia e alternativanan aki pa uza como medio di prevencion den bo bario. Pero nan a ripara cu awo comunidad ta haciendo esaki mas hopi riba nan mes. Esaki ta encera pa bini hunto cu algun bisiña den bario anto crea un Neighborhood Watch por ehempel via grupo di WhatsApp pa por comunica cu otro si mira algo sospechoso.

E tipo di medidanan di prevencion aki ta existi pa basta tempo caba riba paisnan manera Panama, Merca y hopi mas. Esaki awor a cuminsa bira un necesidad na Aruba tambe cual no tabata algo comun riba nos isla. Aworaki e tipo di gruponan aki ta lantando den barionan manera Ponton y Wayaca pa nombra algun. Actualmente comunidad ta mustra di tin mas interes den dje y ta hasta trahando directamente cu polis pa brinda informacion cu ta yuda resolve caso.


Cooperacion cu polis
John Larmonie di Departamento di Prevencion (KPA) ta bisa Bon Dia Aruba: “Hende mes a cuminsa haci nan investigacion riba internet pa wak con pa cuminsa cu un Neighborhood Watch den nan bario. Nan ta cuminsa cu e Whatsapp Group Chat y e ta funciona bon cu hopi bon resultado te ainda.” Segun sr. Larmonie, tur informacion cu ta drenta cerca polis, nan ta registra. Ora cu recherche ta investigando un di e casonan den e area, ya caba nan tin algun detayenan extra pa uza cual ta yuda. “Pa cosnan cu no ta bon nan ta yama Central, patruya ta haci nan best pa bay lo mas rapido posibel pa nos por gara e hendenan mas lihe cu ta posibel. E ta funciona hopi preventivo pasobra ora cu yen hende ta alerta den bario, nan ta alerta otro. Manera un mensahe drenta, tur hende cu normalmente ta paden , ta core sali pafo.”

Pues tin hasta algun Neighborhood Watch cu a inclui algun polis unda cu manera un cos pasa den e bario, nan tambe ta bin di biaha.

Aruba no ta mescos cu antes
Bon Dia Aruba a combersa cu un ex polis cu ta biba den bario di Wayaca kende ta den un di e gruponan di WhatsApp aki. Sr. Krozendijk ta bisa cu su persona ta haya cu Aruba no ta mescos cu antes pa cu siguridad. “Aworaki bo no por djis laga bo portanan habri mas. Nos tin un bon cooperacion entre bisiña akinan cual ta yudando hopi den trece trankilidad den nos bario.” Algun habitante di e bario di Wayaca ta comenta cu cierto area den e bario ta hopi scur anochi anto cu falta di iluminacion. Nan ta admiti cu nan no ta sinti mucho sigur mas na Aruba y lo kier mira entre otro un helicopter bek den laira.

Con pa lanta un Neighborhood Watch
”E iniciativa mester bin for di un hende den e bario. Nos ta propaganda esaki y si hende den e bario tin interes, e ora ey un di nan mester cuminsa tuma e iniciativa pa cuminsa acerca bisiñanan. Nan mester laga carta den nan mailbox pa tin algun anochi di informacion na cas of na un centro di bario. E idea no ta pa nan hinca nan mes den peliger tampoco. E idea ta cu nos manera KPA ta siña nan con pa haci esaki den un manera mas sigur y pa mehora e cooperacion cu tin cu polis tambe” sr. Larmonie ta splica.

E ta agrega cu un di e prome consehonan cu nan ta duna e hendenan, ta pa bay wak ken ta bo polis di bario. Pasobra bo polis di bario ta e link entre e habitante y specialmente e wachtcommandant na e post di polis mas cerca. ”Por ehempel si e habitantenan ta acerca e polis di bario y bisa nan cu tin tal tal problema den e bario, e polis por bay na e siguiente paso pa laga e patruyanan controla den cierto areanan riba cierto ora y dia,”  sr. Larmonie ta sigui splica.
E ta enfatisa finalmente: ”Bo no por haci un Neighborhood Watch bo so. E palabra mes ta indica cu mester union di henter e bario. Check cu bo bisiñanan, organisa un reunion y invita un par di hende cu ta interesa, tuma contacto cu nos tambe di Departamento di Prevencion di Crimen na KPA. Nos ta dispuesto pa yuda bo y duna bo informacion na kico ta e cosnan importante, nos por bin tene un anochi di informacion tambe. Pero e interes di e bario mester t’ey prome. Si no tin interes, e lo no funciona.”