Entrante 1 di januari 2017 ta prohibi pa huma den luganan publico. Negoshinan manera Casa Tua na Playa y algun otro den sector horeca ta bisa cu nan ta cla y no tin ningun problema cu esaki.

 

Bon Dia Aruba a acerca algun di e negoshinan den sector horeca na Renaissance Market Place pa wak con nan ta preparando en cuanto ta e ley nobo. Hopi di e luganan ta bisa cu nan ta prepara y ta acepta e cambio aki. Algun toch no tabata sa tur detaye mirando cu nan no a ricibi ningun otro informacion fuera di loke a sali den prensa.

 

Parlamentario Marlon Sneek (AVP) ta bisa Bon Dia Aruba: “E ta masha simpel: bo no tin mag di huma den espacio publico mas. No tin ningun detayenan fuera cu si bo no cumpli, bo ta bay haya un multa anto bo tin chens di perde bo permiso.”

 

E ley nobo ta encera cu no mag di huma den espacio publico como tambe no mag bende alcohol na menor di 18 aña. E parti di conscientisacion, implementacion y control di e ley aki ta cay directamente bao di Departamento di Salubridad Publico. Cualkier compania cu tin trahado den espacio cera mester por garantisa e trahado ey cu e ta bay traha den un area liber di humamento. Algun negoshi a cuminsa cu esaki riba nan mes prome cu e ley a bin na vigor segun Sr. Sneek. Luganan manera Casa Tua of  su bisiña Plaza Cafe cu tin un area pafo unda cu bo lo por huma.

 

Casinonan a pidi extra tempo

Gerencia di Grand Cafe Tropical cu ta situa na Renaissance Market Place ta bisa cu a yega ora pa e ley aki wordo introduci. Casinonan a pidi extra tempo prome cu nan por implementa e ley pa por haci algun ahustacionnan. Grand Cafe Tropical ta bisa:  “Unico cos cu ta preocupa nos un poco ta e casinonan no ta cay bao di dje mesora. Si introduci e ley,  e mester bira pa tur hende mesora. Ami tabata kier a prohibi humamento den mi negoshi pa basta tempo caba. Mi no a haci e pasobra mi lo perde cliente.” Aworaki cu ta prohibi humamento paden, segun Grand Cafe Tropical, clientenan ta capaz di bay na e casinonan pasobra eynan si ainda ta permiti pa huma y bebe paden. Sin embargo nan ta contento cu e ley a wordo introduci.

 

Parlamentario Sneek: “Ami a presenta e kaderwet aki pero tin detayenan manera por ehempel un luga manera Casa Tua si bo lo por mag huma den e area pafo si of no. Anto e ora ey nos a laga esey pa e departamentonan di gobierno yena e detayenan ey. Den mi ley esaki mester a cuminsa di biaha pero ora cu nos a debati den Parlamento, e peticion a bin di e parlamentarionan pa tene cuenta y duna casinonan flexibilidad pa drecha nan luga adecuadamente. Mi mester a bay di acuerdo cu esaki pa mi haya apoyo pa e ley.”