Desde algun tempo caba noticia y rumor ta circula tocante partimento di tereno na aliadonan di e partido na mando. Ta facil pa pone esaki un banda como redashi di esnan den oposicion, pero e asunto ta bira otro ora den un corant ta sali publica corespondencia di despacho di e ministro concerni cu ta tira un luz diferente riba e asunto. For di e copia di un e-mail di secretaria di e ministro na representante di un compania local nos por conclui diferente aspecto preocupante. Un di e prome cosnan cu ta capta atencion ta cu e e-mail ta dirigi na e directora di Deshaun Development VBA, sra. M. Winterdal. Straño ta cu e e-mail na su persona ta bay na e-mail adres:leoncitaarends@yahoo.com. Esaki ta indica cu e locutora di un di e radionan fuerte di partido berde ta ricibi e corespondencia for di despacho di e ministro, cu no por haci si no a palabra y a duna e adres aki na e despacho pa manda corespondencia di e compania pa e persona aki y no pa e director, cu mester por tin su mes e-mail adres of un di e compania mes.
Seguidamente e contenido di e mensahe: ta manda urgi e compania pa corda paga e contribucion social cu aparentemente nan a palabra di duna un club deportivo di Playa Pabao. Esaki ta parce un condicion cu e ministro a pone pa pasa e tereno na e compania. E señora a haci un proposicion pa paga un suma di Afl. 5925,- na un causa social y ta e ministro segun e e-mail cu a dicidi cu e placa lo bay pa un club den su ‘teritorio politico’. Pregunta ta con por ta cu un ministro ta pone condicion personal na otorgamento di tereno. Como mandatario encarga e mester uza e poder cu a pone den su man na un manera obhetivo y sin distincion di persona. Na luga di haci esey e mes ta crea impresion cu aki ta trata di corupcion pasobra e hecho cu un persona o compania ta dispuesto di haci un donacion di escogencia di e ministro ta mustra caba den direccion di abuso di poder publico pa beneficia persona o instancia di su preferencia. Simplemente un ministro no por actua asina condicionando un acto formal di e pais cu su preferencia personal y mester ta obheto di investigacion si ta trata di custumber of incidente; den tur caso e ta algo grave.
Tin mas detaye interesante cu ta tira un luz dudoso riba e manera di opera di tanto e ministro como e empresa cu aparentemente no ta di e señora cu ta figura como directora. E compania lo mester a haci un peticion formal, cu firma di e director segun statuto registra na Camara di Comercio. Awor nan mester splica Aruba con por ta con den un despacho di un ministro nan ta palabra cu ora mester comunica cu e compania, esaki ta bay via e locutora di e canal di radio conoci. Esaki ta berdaderamente nivel di ‘republica bananera’ unda cu un ministerio cu mester respeta formalidadnan legal, ta ignora esaki y ta manda corespondencia pa un persona cu no tin ni remotamente un responsabilidad den e compania. Pasobra ora bo ta pone un ‘front’ na e compania, loke bo mester haci ta respeta e front y laga e persona aki haci su trabao como director.
Tur esaki no mester straña nos pasobra nos por corda cu den e caso di Roberto Rincón e como persona a haci un peticion pa e tereno na Barcadera, mientras cu e no tabatin ningun cargo den e compania y por lo tanto no por a haci peticion formal pa e compania. Naturalmente cu esey no a stroba e ministro pa pone su famoso ‘krabbel’ di ‘dezerzijds akkoord’ riba un peticion cu legalmente no bal e papel cu e tabata skirbi ariba. Pero ta parce cu den e negoshi aki nada ta stroba e mandatario di dal bay y comete e tipo di barbaridad aki di condiciona emision di erfpacht na donacion social di su gusto.
E pregunta grandi cu ta surgi ta: di cuanto caso asina nos ta papiando den e casi shete aña cu e ministro aki ta sinta na e puesto aki? Ta bira tempo pa autoridadnan hudicial cuminsa actua y por lo menos haci un investigacion preliminar pa haya sa con leu e mal uzo di poder aki ta bay. Den e caso aki ta dificil pa OM manera a yega di sucede den pasado bisa cu nan no sa lesa Papiamento pasobra e carta (cu ta mustra autentico) ta skirbi na Hulandes… Ta straño tambe cu fuera di e publicacion dialuna pasa di e copia di e carta, no tabatin ningun reaccion di banda politico, mientras cu su contenido ta suficiente motibo pa yama e ministro concerni bin duna cuenta di su custumbernan por lo menos no usual, pero posiblemente caso di abuso di poder y hasta di violacion di ley. Nos no por tolera e tipo di cos aki mas.
