Minister di Finansa y Asunto Economico, Xiomara Maduro a pidi tur consumidor pa apodera nan mes pa asina contraresta e ola di abuso riba prijs di productonan cu ta tumando luga den algun negoshinan.
E mandatario via su Facebook-page a bolbe haci un apelacion na e sentido civico y e responsabilidad mutuo cu nos mester tin ora cu un crisis toca nos Pais.
Den esaki y tambe durante un conferencia di prensa cu a tuma luga diabierna, minister Maduro a haci un apelacion fuerte na comercio pa no usa e momento di crisis como oportunidad pa hisa prijsnan innecesariamente.
E mandatario a bisa textualmente lo siguiente: “Nos ta hayando informacion cu tin tienda ta subiendo prijs di productonan di, entre otro, hygiena barbaramente. Esaki nan ta productonan cu no ta conoce prijs maximo paso nan no ta den canasta basico. Pero en bista di e abuso cu ta wordo haci, desde awe TUR tienda cu ta ABUSA di prijs, nan NOMBER lo wordo EXPONI PUBLICAMENTE pa asina e consumidor por sa na unda ta abusa y na unda NO MESTER BAY HACI COMPRAS MAS. Si como consumidor bo topa cu abuso, sea asina bon di saca potret y pone e nomber y manda esaki via e APP Control di Prijs pa asina Departamento Economico por bay over na publica e nomber. Tambe por expone e abuso riba medianan social pa asina mas consumidor por ta alerta.
Desde otro siman control di prijs lo wordo intensiva. Nota na consumidor. Corda cu demanda ta afecta prijs. Si bo ta constata cu tin abuso di prijs NO cumpra e producto na e tienda ey.”
El a solicita pa please comparti e mensahe aki pa e yega serca di tur hende cu kier abusa di Pueblo den momento di crisis.
