(NLTimes)—Ta parce cu e discusionnan di formacion di gabinete na Hulanda a cay den otro diamars anochi, como cu lider di NSC, Pieter Omtzigt, a retira for di e negociacionnan, segun AD y NOS a reporta.
Omtzigt a indica cu e ronda di discusion actual a caba mayormente, y cu negociacionnan entre PVV, NSC, BBB y VVD a fracasa. Fuentenan a bisa cu e discusionnan a caba den un fase “crucial” y “dificil” unda nan no por a surpasa nan diferencianan.
E lider di NSC a nenga e posibilidad pa su partido forma un gobierno mayoria cu e otro tres partido. Omtzigt a cita cu e “estado di finanzas publico” ta motibo pa su retiro, bisando cu e no por apoya un gobierno cu lo haci “promesanan bashi” na e pueblo Hulandes. Omzigt a indica cu su partido lo ta solamente dispuesto pa apoya un gabinete minoria cu PVV, NSC y BBB riba cierto asunto, pero e no lo uni cu nan pa forma un gabinete. Tambe e lo ta dispuesto pa apoya un otro diferente gobierno cu por garna apoyo amplio den parlamento.
Ronald Plasterk a haya sa tocante e desaroyo aki den un mensahe manda via WhatsApp. E ex-politico cu ta liderando e discusionnan di formacion a conta ANP cu e tabata “un tiki sorprendi” tocante e “storia confuso” cu el a tende.
E estado financiero di asuntonan kisas no ta e unico motibo pakico Omtzigt a retira
Omtzigt a skirbi un carta na e miembronan di su partido pa bisa nan cu el a evalua “aproximadamente 20” carta for di varios oficina di gobierno, algun cu informacion clasifica. El a bisa cu e informacion a mustra cu e gobierno Hulandes tabata enfrentando un situacion financiero mas dificil compara cu loke a kere prome.
“NSC ta hopi sorprendi despues di e lesa e cartanan awe. NSC ta nota cu, desde awe, nos tin un expectativa hopi diferente riba finanzas pa e proximo añanan,” el a skirbi. “Bao di ningun circunstancia lo NSC kier haci promesanan na e pueblo Hulandes, cual e sa di antemano ta promesanan bashi cu cual no por ser cumpli durante e proximo periodo di gabinete. Bo no por crea siguridad social cu kasteelnan den shelo.”
Sinembargo, AD a nota cu e cartanan tocante e estado financiero di asuntonan a ser manda pa PVV, NSC, BBB y VVD den e ultimo siman di januari. “Pa awo, e trabao di NSC a ser completa den e ronda aki y e partido lo warda riba e rapport for di e informante Plasterk,” Omtzigt a skirbi.
Kisas no lo ser revela completamente si NSC tabatin mas motibo pa retira for di e negociacionnan. E cuatro partidonan a negocia den un atmosfera tenso durante e ultimo simannan, marca pa comentarionan personal for di Wilders riba red social, y desconfiansa en general. Ora Wilders a regresa riba red social dialuna pa e cuatro partidonan resolve nan diferencianan, lider di VVD, Dilan Yesilgöz y lider di BBB, Caroline van der Plas, a bay den acuerdo, pero Omtzigt a keda keto.
Ronald Plasterk a invita e lidernan di tur cuatro partido na e reunion otro siman diamars anochi pa “conclui cu e discusionnan adecuadamente,” el a bisa. Wilders ta spera cu Omtzigt lo acepta e invitacion. Segun e, Omtzigt ta debe e partidonan “y tambe Hulanda” un splicacion.
E lidernan di PVV, VVD y BBB lo kier un splicacion for di Pieter Omtzigt tocante e retira diripiente di NSC for di e negociacionnan di formacion di gabinete. Segun Geert Wilders, Omtzigt a actua “cu falta di respet.” E lider di PVV a yam’e “straño cu un hende cu ta kere ta importante pa nos subraya e importancia di institucionnan den e cultura administrativo nobo lo manda un mensahe y despues no presenta,” Wilders a bisa.
E lider di PVV tambe a bisa cu Omtzigt tabata tumando e ruta di cobarde y cu esaki e ta habriendo e porta pa lider di GroenLinks-PvdA, Frans Timmermans. “Mi no ta kere esey ta parti di e interes nacional. Ultimamente, e votadonan kier un gabinete centro derecho.”
