Den un carta cu fecha 14 di augustus na presidente di Tweede Kamer der Staten-Generaal, secretario di estado Raymond Knops a indica cu Corsou tin te 1 di september pa formalisa su cumplimento cu e condicionnan pa e di 2 tranche di sosten di liquidez. Mientrastanto Aruba mag sigui cu negociacion pa e condicionnan di e di 3 prestamo di liquidez.

 

Sint Maarten a cambio no ta cumpli cu e condicionnan y si cumpli cu e condicionnan despues, conseho di minister di Reino lo evalua e necesidad pa sosten di liquidez.

Den su carta Knops a splica na parlamento Hulandes cu Aruba pa gran parti ya caba ta cumpli cu e condicionnan den e di dos tranche, cu excepcion di e condicion di pone un plafond riba e salarionan cu funcionarionan halto di institutonan (semi) publico ta gana, na un maximo di 130% di e salario di prome minister. Aruba a haya di conseho di minister di Reino te prome di october pa entrega legislacion aproba pa parlamento unda e norma ‘Wever-Croes’ lo mester ta formalisa. Knops ta splica cu mirando e cumplimento cu condicionnan di e di 2 tranche, Aruba en principio ta bin na remarke pa un di 3 tranche.

 

Tambe Knops a bisa cu ta den negociacionnan extenso cu Aruba riba e pakete di condicion pa e di 3 tranche, cual tambe ta forma e totalidad di condicion pa asina conseho di minister di Reino aproba e tercer prestamo di liquidez pa e isla. E secretario di estado a indica cu pareu cu tin algo di notifica riba e resultado di e deliberacionnan aki, e lo informa parlamento.

A diferencia di Aruba, Corsou y Sint Maarten no por a demostra cu nan ta cumpli cu e condicionnan di e segundo sosten di likides di Hulanda. Corsou y Sint Maarten tabatin te 15 di juli pa duna Colegio di Supervision Financiero CFT (y ministerio di Finanzas ora ta trata di condicionnan di sector financiero) informacion riba nan cumplimento cu e condicionnan, pa cual CFT a duna un conseho 11 di augustus ultimo. Den conseho di minister di Reino a delibera riba e conseho aki ayera.

Corsou mester formalisa cumplimento, Hulanda no ta contra deliberacion

CFT a indica den nan conseho cu Corsou a tuma stapnan significante pa asina cumpli cu tur condicion, pero asina mes no a logra cumpli cu tur condicion pa e di dos sosten di liquidez completamente. Riba mayoria di condicion Corsou a tuma decision y e decisionnan aki ta den ehecucion, pero gobernacion di e isla no a logra formalisa un cantidad di medida ainda. Knops ta menciona cu e salarionan di politiconan a baha cu 25% caba, pero e legislacion cu mester formalisa esaki ainda ta den preparacion. E situacion ta mescos pa e condicion di baha e pakete laboral den su totalidad pa trahadonan den sector (semi) publico cu 12.5%.

 

Pa e razon aki a duna Corsou te 1 di september pa entrega informacion na CFT y ministerio di Finanzas unda ta constata cu a formalisa e cumplimento di condicionnan. Despues di esaki CFT lo traha otro conseho, pa mas tarda pa 7 di september.

 

Knops a indica cu esaki no ta nifica cu entretanto, prome cu mester dicidi riba e formalisacion di cumplimento cu e condicionnan di e di dos pakete di likides, Corsou no lo por bay den deliberacion cu Hulanda riba e condicionnan di e di 3 tranche manera e landspakketnan y e entidad di reforma.

Sint Maarten no mag delibera cu Hulanda riba di 3 pakete

Mirando cu Sint Maarten no a cumpli cu e condicionnan di e di 2 tranche di sosten financiero, Knops a indica cu no por drenta den combersacion cu e isla riba e condicionnan pa e di 3 sosten di liquidez. E secretario di estado ta indica cu si Sint Maarten kier inicia e deliberacionnan aki ainda, e pais mester indica na CFT cu entretanto a cumpli cu tur condicion di e segundo y tercer tranche. Knops ta finalisa su carta bisando cu den e caso ey, conseho di minister di Reino lo evalua a base di e circunstancianan di e momento, unda en todo caso lo bay mira si tin necesidad ainda pa sosten di liquidez pa e isla.