Recientemente Premier Evelyn Wever-Croes a elabora riba e situacion di Citgo. E negociacionnan entre Gobierno y Citgo pa yega na un terminacion di contract ainda ta andando. Mirando cu e acuerdo firma entre Gobierno di Aruba y Citgo na aña 2016 ta uno grandi y hopi elabora, ta dificil pa defini un bon momento pa terminacion.
Segun Wever-Croes su persona no ta altanto di tur e detayenan cu tin den e contract pero e sa si cu na final Gobierno mester bay Parlamento prome cu firma pa terminacion mescos cu a bay Parlamento pa e contract aki wordo aproba.
Segun e comunicado cu nos a ricibi ta indica cu mientras tanto Citgo a yega na un acuerdo cu tur trahado pa paga cada un nan cesantia y añanan di trabou. E reto actual ta cu tur e trahadonan aki ta sin trabou y ta wardando riba Gobierno pa cera un acuerdo cu un operador nobo pa asina nan por haya un trabou nobo. Esaki sigur lo tuma su tempo mirando cu te cu awe ainda no por yega na un acuerdo di terminacion. Prome Minister a accentua cu tanten Gobierno no tin e yabi di refineria lo no por sinta na mesa cu un otro operador.
Prome Minister tambe a duna un splicacion di tur e pasonan ainda cu lo mester tuma den caso cu yega na un acuerdo di terminacion cu Citgo. Segun Premier Wever-Croes e caminda ta uno cu lo tuma su tempo. Na momento cu Aruba logra yega na un acuerdo di terminacion y firma esaki, e draft final lo mester bay Parlamento pa aprobacion y unabes Prome Minister haya e aprobacion aki e lo por firma e terminacion cu Citgo. Unabes e acuerdo di terminacion ta firma, Aruba lo publica internacionalmente cu ta buscando un partner cu lo desea di inverti den e economia di nos pais. E por ta den forma di un refineria of cualkier otro idea cu por tin, Aruba ta habri a scucha tur otro opcion cu bin riba mesa.
E condicionnan stipula pa drenta den un acuerdo cu Aruba pa inverti lo ta encera cu e compania lo mester ta uno serio y cu tin su propio fondo. Si ta petroleo, nan lo mester tin nan propio petroleo y evita pa cay atrobe den sancionnan di Venezuela. E compania mester por paga su fair share na gobierno, mester por crea cupo di trabou, cu por paga su empleadonan bon y cu ta cumpli cu e exigencianan di medio ambiente.
Despues cu Aruba saca e publicacion aki, lo mester cumpli cu reglanan internacional y duna 2 pa 3 luna pa asina tur partner tin e oportunidad pa expresa nan interes. Tur e aplicacionnan lo ser evalua na momento cu nan drenta pero e decision final no por ser tuma te ora cu tur interesado haya oportunidad pa expresa nan interes. Unabes e proceso di aplicacion cera, porfin e comision cu Prome Minister a papia di dje desde aña pasa mei, lo haya e oportunidad pa evalua tur loke a wordo entrega pa asina determina tambe kico ta e miho pa pais Aruba.
