Necesidad pa cantidad di maestro den enseñansa primario; IPA preparando su anochi informativo pa diferente curso y opleiding

Instituto Pedagogico Arubano (IPA) a duna di conoce e actividadnan cu nan ta bay tin dia 14 di november cual ta trata di un Open Dag cu ta bay cuminsa 6or di atardi y ta culmina 9or y mey di anochi.

Berthson Boekhoudt, director di estudionan inicial na IPA a conta cu den e Open Dag aki nan ta bay elabora riba tres diferente tipo di estudio cu nan ta bay ofrece desde augustus di 2023. E prome ta trata di estudionan pa bira maestro di enseñansa primario, e di dos ta trata di Pedagogisch Didactisch Getuigschrift (PDG) y di tres ta Master of Science of Education (MSE).

Boekhoudt a elabora riba loke tin mester pa aplica pa bira maestro di enseñansa primario. Pa esaki el a indica cu e persona mester gusta traha cu mucha, splica diferente materia, mester tin HAVO y VWO diploma, un nivel di MBO nivel 4 of si kisas ta den examenklas e aña aki e persona por aplica pa bira maestro di enseñansa primario.

Ademas, el a señala cu pa basta aña tin un necesidad pa loke ta trata e cantidad di maestronan di enseñansa primario na scolnan y esey ta un estudio cu nan tin tur aña y loke nan ta produci cada biaha ta net cubri e vacaturanan existente, “e ta un estudio cu tin un necesidad p’e te aworaki”, el a bisa.

Den su opinion, Boekhoudt a comenta cu esaki ta un profesion cu segun su coleganan cu tin mas edad cu e ta bisa cu “esaki ta un profesion cu antes tabata algo cu por bisa mas respeta den comunidad mes, esey a cambia den e tempo y a bin otro profesionnan tambe cu tin hende cu no ta wak asina interesante, pero e ta un profesion cu mañan bo ta bay yuda guia full un generacion nobo, e ta un profesion pionero”.

Di su parti, Jumira Spier ken ta fungi como cursusleiding e aña aki a splica cu estudionan di Pedagogisch Didactisch Getuigschrift (PDG) ta un curso di 18 pa 24 luna caminda e personanan por certifica nan mes pa duna les den enseñansa, den e curso aki ta haya diferente contenido como por ehemplo con ta bay duna les di un manera mas activo y mas efectivo, e grupo meta cu por aplica pa PDG ta hendenan cu tin un HBO diploma, bachelor degree of master degree.

Personanan interesa por subi riba e website www.ipaaruba.com unda tin un procedura digital pa yena, e inscripcion pa opleidingnan aki ta cera dia 20 di januari di 2023.

Mas informacion lo wordo duna e dia 14 di november den e open dag unda tambe e persona por experiencia un tiki di loke estudionan ta bay encera unda lo tin diferente actividadnan di diferente materia pero tambe lo splica con e procedura ta bay ta.