‘Necesidad di trahado social, pero dificultad pa haya trabou den dje’

Docente Social Work & Deveopment na Universidad di Aruba, esta Kimberley Wever tambe ta di opinion cu tin un necesidad di trahado social na Aruba. Pero tin dificultad tambe pa e studiantenan haya trabou ora nan caba cu nan estudio di trahado social na universidad.

Sra. Wever ta conta Bon Dia Aruba cu mas o menos 30% di studiante no ta caba e estudio di trahado social pa diferente motibo. E ultimo añanan e porcentahe aki si ta bahando. Mas studiantenan ta graduando pa motibo cu nan ta hopi mas miho informa di e estudio y tambe mas ta keda Aruba enbes di bay afo, segun e docente. Ya bo ta haya lesnan cu ta caba nan estudio y ta sigui pa e trabou mesora aki na Aruba mes. Tambe el a ripara cu studiantenan ta cada biaha mas activo y hopi mas interesa. Acerca si tin dificultad pa studiantenan haya trabou despues di caba nan estudio, sra. Wever ta bisa.

Sra. Wever tambe ta di opinion cu en berdad ta haci falta di mas trahadonan social na Aruba, ‘un falta basta grandi’. E ta duna ehempel di SKOA (directiva di scolnan catolico) unda tin demasiado mucha ta cay abou di algun trahado social. E realidad ta cu nan no ta yega na e casonan menos severo. Hopi biaha ta ora cu cosnan escala, ta ora cu ta tuma nota di nan. “Esaki ta simplemente pasobra cu tin atencion ariba esunnan cu a escala caba y no tin suficiente hende pa duna atencion na e casonan mas chikito.”

Sra. Wever ta bisa cu den su opinion cada scol mester tin nan mesun trahado social asina por traha preventivo y no solamente ora cu el a escala. E no a bisa esaki pa desacredita e trabou aki ya cu e ta compronde cu e ta un trabou duro. Pero pa mes motibo aki ta haci falta e refuerso.

E ta menciona cu tin instancianan tambe cu no tin ningun trahado social y falta di guia. Tambe KIA, ora cu persona nan sali for di KIA, no tin suficiente ‘follow up’ na momento cu prizoneronan sali. “Si tin pero no suficiente.” Sra. Wever ta bisa cu si tin interes den e estudio. Pero ta haci falta di trahadonan social pa motibo cu no ta den man di e studiantenan sino na man di gobierno y organisacionnan pa tuma mas trahadonan social den servicio.