Mary Joan foundation:
Vice-presidente di Mary Joan Foundation, Jose Tromp a ‘aplaudi’ e iniciativa di organisacion Miss Teen Internacional Aruba pa recauda fondo pa e fundacion aki sigui yuda e pashentnan victima di cancer na pecho.
E necesidad di fondo cu e fundacion aki tin ta refleha e magnitud di e problema di cancer riba nos isla. Sr. Tromp a declara na Bon Dia Aruba cu actualmente no tin data actualisa. Nan ta basando ainda riba data bieu cu ta indica cu cancer di pecho ta e number uno na Aruba. “Nos tin cu bisa cu di 8 di cada 10 persona, 2 ta wordo diagnostica cu cancer na pecho.”
Organisacion Miss Teen Internacional Aruba hunto cu e candidatanan cu lo participa den e certamen final cu lo tuma luga dia 15 di juni awor, ta cla pa dedica henter un dia pa recauda fondo pa e fundacion aki. Nan meta ta pa colecta 10 mil florin of mas. Sr. Tromp ta haya e iniciativa aki ‘hopi bunita’. Nan ta spera cu mas hendenan y organisacion por bin cu e tipo di iniciativa social aki pa por yuda alivia e gastonan halto cu e fundacion aki tin.
“Nos gastonan di tur aña ta hopi halto y asina nan por aporta algo pa nos fundacion.”
Mary Joan foundation ta brinda ayudo pa nan clientenan cu ta e pashentnan di cancer. E tipo di ayudo cu nan ta duna ta psicosocial. Cu e concepto aki nan ta yuda no solamente e pashent, pero tambe e famia, amigonan y conoci rond di e pashent.
Segun sr. Tromp nan por haya ayudo psicologicamente y tambe nan por haya ayudo social. E ayudo social aki ta abarca tur aspecto, entre nan actividad cu nan ta organisa pa yuda e pashentnan of e por ta individual tambe.
Aunke e fundacion aki a wordo lanta pa brinda ayudo muy particularmente na nan clientenan victima di cancer na pecho, pero nan porta ta habri pa tur persona cu ta busca ayudo social of psicosocial y cu tin otro tipo di cancer tambe. “Nos no ta nenga niun hende ayudo”, el a bisa.
E ta bisa danki na tur hende cu ta brinda nan sosten pa e fundacion aki por sigui brinda su ayudo na nan clientenan. Manera Mary Joan Foundation su lema ta bisa: “No enfrenta cancer di pecho bo so.” Esaki ta un parti cu e fundacion aki ta para su tras.
Cifra di mortalidad
Segun informacion suministra pa Jurette Croes kende ta Communicatie Adviseur di departamento di Salubridad Publico (DVG), e causa di morto na Aruba pa e malesanan relaciona cu cancer ta considerabel.
Investigacion realisa pa Unidad di Epidemiologia y Investigacion di DVG, ta mustra cu entre 1999 -2016, un total di 2.492 persona a muri debi na cancer. E ta un promedio di 138 morto anual.
E tabla ta mustra un vision general di e total di hendenan morto pa cancer maligno pa aña. Cancer na pecho ta e di tres causa di morto pa e malesa aki. E cantidad di hende homber compara cu hende muhe cu a muri pa causa di cancer maligno ta casi mesun cos. (50.6% vs 49.4% respectivamente). Mientras cu un 85.3% di e total di e victimanan di cancer ta persona di mas cu 55 aña.
