— Cu tanto informe drentando di casnan inunda, autonan lastra y emergencianan pisa pa via di e yobida pisa, ta casi logico pa lubida cu na final di dia ta trata aki di un fenomeno natural, cu tin su bunitesa tambe. E potret aki, saca den area di Parke Nacional Arikok pa e fotografo local Alan Coutinho, ta mustra un fenomeno cu no sa pasa hopi riba nos isla; mist. Poco despues cu e parti mas fuerte di e yobida a pasa por a mira neblina den area di Yamanota, dunando e un ambiente fresco y completamente diferente cu hende ta custumbra cune. Y no solamente eynan, pero tambe Hooiberg a wordo cubri parcialmente cu nubia hopi abou.
