Den un comunicado cu Cuerpo Policial a manda referente protesta di Richinel Danies dilanti Gabinete di Gobernador, ta indica cu ta sigui conseho di NCTVI, esta Centraal Bureau Terrorsmebestrijding, Veiligheid en Interpol. Director di e instituto aki a indica cu nan conseho tabata den cuadro di infraccion di APV (pone tent). E director ta haya cu Cuerpo Policial por a comunica esaki poco miho.

Den un comunicado manda ayera mainta, Cuerpo Policial ta comunica pakico a detene Richinel Danies antayera atardi. Den e comunicado ta indica cu mando policial di KPA tabata den consulta constante cu Siguridad Nacional y NCTVI y tabata sigui nan conseho referente e protesta. Mando policial a duna orden pa kita obhetonan bou cual ta tent, banner cu e palabranan Aruba Pro Pedofiel skirbi riba dje y un par di borchi.

Den e comunicado aki, no ta mucho cla kico ta e rolnan di e organisacionnan nombra, cual lo por crea un confusion. Den combersacion cu e director di e instituto NCTVI Adolfo Richardson, e ta haya cu por a comunica e aspecto aki poco miho di parti di Cuerpo Policial.

E director ta splica cu a pidi pa comunica esaki den un manera specifico, mirando cu e topico ta algo cu ta biba bou pueblo y mirando cu e protesta ta valido, basa riba e hecho cu e derecho di manifesta ta sagrado, segun Richardson. Sinembargo, ‘e contenido di e mensahe no a bay manera tabata di spera’. Richardson a pidi specificamente pa subraya cu e derecho di manifesta ta absoluto, pero cu simplemente no por permiti infraccion di ley, den e caso aki APV. NCTVI tin varios tarea, bou cual ta cay entre otro siguridad di edificionan y obhetonan of propiedadnan, por ehempel den e caso aki edificio di Parlamento y edificio di Gabinete di Gobernador.

Pa proximo biaha sigura cu comunicacion sali di e manera mas satisfactorio lo pidi pa den casonan cu comunicadonan mester sali, voceronan di e varios organisacionnan mes ta presente pa asina e comunicacion na publico bay di manera mas specifico cu ta posibel.

Tareanan di NCTVI
Maske e instituto aki a wordo menciona den un comunicado recien, Richardson ta indica cu e trabounan cu NCTVI ta eherce ta trabounan mas ‘den background’. Richardson ta conoci pa su tempo como Korpschef di KPA, pero aworaki ta traha den un organisacion cu no ta sali tanto den publicidad.

Esaki ta bin pa via cu e organisacion ta lidia cu topiconan manera contra-terorismo (counterterrorism), e aspecto di siguridad di propiedad menciona anteriormente, pero tambe siguridad di oficialnan di gobierno manera ministernan, huesnan, directornan di departamento, PG, fiscalnan, etc.

NCTVI, pa conocemento general di nos lesadonan, ta un organo cu ta monitor e topiconan menciona, ta traha maneho y ley, pero tambe ta conseha riba sistemanan di siguridad y tin enlace cu e sistema di Interpol. Richardson ta indica cu e aspecto di Interpol tabata necesario, mirando cu den pasado un persona cu ta persigui internacionalmente pa crimennan grave, no lo a lanta ningun sospecho na momento cu e drenta Aruba.

“Si nos no sali den publicidad, ta nifica cu nos ta haciendo nos trabou, pasobra e trabou ta pa sigura cu tur cos ta den ordo den e aspecto di siguridad”. Ultimo cu por a mira e departamento aki den accion tabata e caso di e hack den hospital, unda un ransomware tabata exigi pago di un suma pa asina no horta informacion di pashent y di hospital. Richardson tabata presente pa e conferencia di prensa riba e tema aki tempo pasa pasobra e incidente aki a cay bou e tarea di ‘crisis management’ di e departamento.

NCTVI ta un tipo di ‘overkoepelend orgaan’, cual ta nifica cu e ta un organo cu ta colecta informacion y conseho di varios departamento y partner y ta resumi esaki. E partnernan di NCTVI ta entre otro OM, Siguridad Nacional, Veiligheidsdienst Aruba (VDA), KPA, y hasta servicionan similar na otro paisnan, mirando e aspecto di contra-terorismo.

Pronto NCTVI ta spera pa tambe implementa tareanan di screening di inversionistanan di afo. Esaki segun director, ta un tarea cu oficialmente ya caba ta duna NCTVI responsabilidad, pero e departamento ta implementando esaki pa asina sigura cu inversionistanan cu conexionnan dudoso no lo por inverti na Aruba.