(AP)—E nave espacial Luna-25 di Rusia cay riba e luna despues cu el a keda bira den un orbito incontrolabel, segun e agencia di espacio di e pais, Roscocosmos, a bisa ayera.
E nave sin piloto tabata diseña pa ta e prome pa yega na e zuidpool lunar, un area unda cientificonan ta kere cu por tin reservanan importante di awa congela y elementonan precioso. E mester a yega e area awe. Sinembargo, Roscocosmos a bisa cu el a perde contacto cu Luna-12 diasabra despues cu e nave a haya dificultad y a reporta un “situacion abnormal.”
“e aparato a move den un orbito inespera y no por a sali for di dje, cual a resulta den un accident riba e superficie di e luna,” e declaracion di e agencia ta bisa. E Luna-25 tabata den un careda cu un nave di espacio di India cu a ser lansa dia 14 di juli, pa ta e prome pa yega e zuidpool. Tabatin e expectativa cu ambos lo yega e luna entre 21 y 23 di augustus.
Vitaly Egorov, un analista di espacio Ruso, a bisa cu a pesar di e accident, e mision tabatin exitonan: “Luna-15 a mustra progreso importante. El a bula bay den direccion di e luna, a conduci un coreccion di orbito y a test hermentnan electronico y cientifico den a nave,” el a bisa via videocall. “El a hasta colecta algun data cientifico durante e vuelo y for di e orbito lunar. Tambe el a manda potret di e luna. Cosmonautanan Ruso nunca a yega e nivel aki den pasado. Pero despues, di un manera of otro, un eror a sosode.”
E mision lunar tabata e prome di Rusia desde 1976, ora e pais tabata parti di e Union Sovietico. Solamente tres gobierno a logra yega na e luna exitosamento: e Union Sovietico, Merca y China. E zuidpool lunar ta particularmente interesante pa cientificonan, ken ta kere cu e kraternan polar por contene awa congela den e piedranan cu exploradonan den futuro por transforma den aire y combustibel pa nave espacial.
Un intento na aña 2019 di parti India pa yega na e zuidpool a caba ora e nave espacial di nan tambe a accidenta riba e superficie di e luna. Roscocosmos a bisa cu e kier mustra cu Rusia “ta un estado capabel di entrega carganan valioso na e luna,” y “pa sigura e acceso garantisa di Rusia pa e superficie di e luna.”
Egorov a bisa cu Roscocosmos mester e experencia di yega desembarca riba e luna.”E no por compara cu China, pasobra e pais ey ta tin tres desembarcacion exitoso riba e luna, mientras cu Roscocosmos no tin ningun,” el a bisa. “Roscocosmos lo keda atras den e programa lunar di China.”
Sancionnan implementa riba Rusia desde cu el a cuminsa su actonan di guera riba Ucrania a afecta e programa espacial, cual a haci’e mas dificil pa haya acceso na tecnologia occidental. Den inicio, luna-25 tabata diseña pa carga un rover lunar chikito pero e idea ey a ser bandona pa reduci e peso di e nave pa mas confiansa,” analistanan a bisa. E nave a ser lansa for di e Vostochny Cosmodrone na Rusia dia 10 di augustus. E waf espacial ta un proyecto di Presidente Vladimir Putin y ta importante den su esfuersonan pa haci Rusia e poder central di conocemento espacial.
