Dia 1 di augustus ta bay ta un dia sumamente importante y special pa Natusha Croes, conoci den mundo artistico como “Caricia”. E dia aki e ta bay celebra su hacimento di aña cu e lansamento di su prome disco “E’ Mantra” y un concierto cu ta bay tuma luga na Cas di Cultura.

Den un entrevista cu Bon Dia Aruba, el a conta cu e ta un persona conoci den mundo cultural como un artista, productor y gestor cultural. El a studia na un academia di arte y despues el a specialisa den music performance.

Pa Croes, musica semper a reina den su famia mirando cu su tata ta Hildward Croes y semper e tabatin un pasion pa canto, baile, expresion escenico. Croes por a desaroya su mes den su extended playlist cu ta contene 7 cantica den idioma Papiamento, denomina E’Mantra, cual a ser composita door di su persona.

Di esaki, el a afirma cu el a haci e produccion musical di e mayoria di e composicion aki cu asistencia di ingeniero di zonido Huberth Thiel e cual a desaroya canticanan como Manifesta, Sondeo, Rosea, Sentido, Suspira, Ritmo y Rikesa.

“Hopi di e palabranan aki ta accionnan pero tambe nan ta simbolisa afirmacionnan, loke bo tin cu afirma, e mantra ta loke bo ta afirma na bo mes pa bo por alinea na bo creencianan y e disco aki ta un exploracion interno di poder creativo pa por yega na e acceso di e creador cu ta biba den nos y con pa supera tur e diferente obstaculonan crea door di nos mesun persona pero tambe di nos circunstancianan kisas di niñez.”

Pa su prome disco, Croes a scoge pa su prome canticanan ta den su lenga materno mirando cu tambe e tin un aprecio pa esaki y pa por keda stimula e idioma.

E ta considera su mes como un poeta tambe y hopi di e aspecto musical ta hopi lirico, a usa hopi sinfonia di bos tambe pa por composita e melodianan, e canto y e parti vocal ta loke ta reina hopi den e produccion manera e ta sigura.

Tin un genero contemporaneo cu canticanan movi, bailabel y tambe tin fusion di ritmonan folklorico manera tambu y ademas tin electronico mas experimental y vanguardista “e ta un produccion cu ta pushando un tiki mas aya den main stream treciendo algo mas nobo y empoderante pa e comunidad di Aruba”. El a afirma.

Despues cu su tata a fayece, Croes a sigura cu el a haya hopi refugio den e redescubrimento di su relacion cu musica, el a studia como un artista visual, di arte plastico, pero den su sanger ta reina un herencia musical hopi grandi, “despues cu mi tata a muri mi a sinti hopi refugio y hopi consuelo door di redescubri mi mes como cantante y como escritor y e ora ey mi mes a cuminsa traha den mi forma vanguardista instrumentonan pa por toca usando e paisahe di Aruba,” el a bisa.

Su prome produccion cu un performance audiovisual ta yama “Impactus” unda el a activa cu zonidonan e cadushinan y ta crea ritmo cu e cadushi pa asina cuminsa composita ritmonan a base di su conexion cu Aruba como tera y despues el a avansa y keda desaroya su mes como productor musical usando no solamente e ritmonan cu e ta genera di su contacto cu Aruba, sino tambe e aspecto mas di palabra y poesia cu e semper tabatin den su practica como artista.

“Esey a cuminsa duna luz na cancionnan y ma cuminsa ripara cu e ta un proceso cu manera cu hopi hende lo sa den e mundo musical y artistico, un produccion cu pa por conclui e ta dura bo mas cu tres aña pasobra hopi di e cancion bo lo mester tin un tiki pasenshi, pasobra nan ta bin di mas aya, tin ora mi ta band’i lama y e letternan ta cuminsa baha for di mas aya y hopi di e cancion tabata asina, bo mester tin un tiki pasenshi pa e mensahe aki cu kier ser transmiti door di bo persona y esey mi ta haya e parti mas bunita,” Croes a declara.

Su intencion awor ta pa lansa su disco y por sigui comparti den tres idioma cu ta papiamento, Ingles y Spaño debi cu esey ta e tres idioma cu e ta sinti su rais hopi fuerte den dje, “ta cancionnan cu ta transmitiendo nan mes door di mi ser y door di mi curiosidad cu mi tin pa musica cu mi tin como vinculo spiritual.”

E tin varios cantica den proceso cu ta casi den su etapa final manera el a sigura, pa asina e por continua compartiendo su musica no solamente na papiamento of Ingles sino den otro idioma pa por tin accesibilidad na un publico mas amplio.

Pa finalisa, e ta spera di por transmiti hopi curiosidad y cu tur esnan sinti nan mes impulsa pa sigui Natusha Croes riba tur red social cu e nomber di “Caricia” cu ya caba hende por pre-saved e disco aki riba e plataforma di Spotify y despues e lo ta disponibel riba tur plataforma musical pa tur hende por scuchel’e “ y e por resona den cada persona.”

Pa loke ta trata e lansamento di e disco E Mantra, pa dia 1 di augustus Croes ta bay celebra su hacimento di aña y door di esey ta bay realisa cu un concierto na expo zaal di Cas di Cultura for di 8or di anochi, e carchi tin un costo di 25 florin y tambe por tuma contacto na e number di telefon 562.3217.