Diaranson mainta a tuma luga e di dos caso den corte di Aruba relaciona cu sentencia riba tereno(nan) na Bubali caminda RBM Estates NV, Stichting Aruba Birdlife Conservation y Land Aruba a wordo scucha den e caso y a defende nan interes. Ainda tin oportunidad grandi cu naturalesa ta bay haya un chens y Hues a conclui pa dicta e siguiente veredicto dia 6 di juli venidero.
Segun presidente di Fundacion Aruba Birdlife Conservation, sr. Greg Peterson, gobierno a tuma un posicion cu nan no a spera pero cu sinembargo ta uno positivo. Segun Johan Sjiem-Fat , representante di gobierno di Aruba, ta asina cu gobierno y minister a pensa ariba e asunto un tiki mas profundo y tambe tabata tin conseho nan huridico cu minister a yega na e conclusion cu e posicion anterior no tabata 100% corecto. ”Ta asina cu en berdad gobierno tin pensa di duna RBM Estates NV e terenonan den erfpacht pero e no por sosode aworaki. Pa por haci esey mester cambia e R.O.P. y nan mester carga pasenshi y nos no por pronostica cu siguridad cu e cambio di R.O.P. ta bay resulta manera nos tin pensa pasobra e ta depende di e procedura.” sr. Sjiem-Fat ta bisa.
Sr.Sjiem-Fat ta agrega cu tin procedura cu ta trece cun’e cu mester publica e cambio di R.O.P. y cu mester tin oportunidad pa presenta e posicion di partido nan interesa y tambe mester bin conseho for di e Raad voor de Ruimtelijke Ordening . Tur esaki segun sr. Sjiem -Fat mester sosode prome cu tuma un decision final ariba e cambio R.O.P. ”P’esey nos no por bay di acuerdo cu e entrega di e derecho di erfpacht aworaki. Gobierno tabata di opinion cu ta trata di un margen masha limita na e Bubali plas, y cu no por bay afecta e Flora y Fauna anto pa e motibo ey tin masha hopi desaroyo den e mesun area y gobierno ta considera cu e interes di desaroyo economico ta mas importante y cu e no ta bay afecta naturalesa den e luga aki” ,sr.Sjiem-Fat ta comenta.
Geoffrey B.Wever, representante di RBM Estates NV ta splica Bon Dia cu: ”Nos ta kere cu nos cliente tabata tin derecho pa gobierno cumpli cun’e y ta pa esey nos a dicidi di lanta e caso aki anto e la bay bon y nos ta contento cu hues a scucha nos posicion. Aworaki nos tin cu warda, gobierno y e fundacion di ABC a bin cu su defensa y hunto nan a bisa cu RBM Estates NV eigenlijk no tin e derecho pa haya e erfpacht cual tabata nan argumento primordial. Despues e abogado di gobierno a confirma cu sinembargo e opinion cu e cliente a cumpli cu e condicion nan, cu e derecho ta valido y cu gobierno en principio lo kier duna e derecho pero mester warda e cambio di e ley pues e cambio di R.O.P. ” sr. Wever ta splica Bon Dia. Sr. Wever ta agrega cu nan argumento tabata ta cu e R.O.P. no ta valido y no ta preveni gobierno pa no otorga e derecho anto despues di e sentencia riba 6 di juli lo evalua e caso nan siguiente.
No solamente Bubali, pero naturalesa rond Aruba tin un chens ainda
”Nos ta hopi positivo di con e caso a bay awe pasobra pais Aruba a defende eigenlijk un punto di bista cu na prome instancia nos a kere nan no lo bin cun’e, pero nan a laga sa cu R.O.P. ta un maneho di gobierno y cu den zona berde no mag di traha riba tipo di proyecto asina ki”, Presidente di Aruba Birdlife Conservation Greg Peterson a splica Bon Dia.
Sr.. Peterson ta agrega cu gobierno tambe ta laga un porta patras habri cu ta indica cu si nan habri e R.O.P. nan por bay manipula locual ta zona berde aworaki. ”A base di esey, ainda cierto desaroyonan por haya permiso pa den futuro bay traha nan proyectonan. Nos mester paga tino riba e parti ey y sigura cu esey no por ta djis un stap pa desvia eigenlijk di henter e sentencia di hues. Pero banda di esey, nos ta contento si cu e parti di gobierno a laga sa awe cu e R.O.P. ta un maneho y e ta vast, cu gobierno mes a yega di haci fout cu esaki pero awo cu nan ta para tras cu e desaroyo di RBM Estates NV no ta uno cu ta aceptabel den zona berde” sr. Peterson a bisa.
