Na luna di maart e potret di un chubato riba un area bao conservacion, esta Isla di Oro, a genera consternacion den comunidad, un area protegi pa ley y cu dia 29 di juni hues di corte di prome instancia Van de Leur a duna su veredicto poniendo naturalesa den prome luga.

Documento entero: https://drive.google.com/file/d/1mTYw8fOL9XKZjU7M2oA2RnAXqES-CkWj/view?usp=drive_link

Fundacion Parke Nacional Aruba (FPNA) conhuntamente cu otro fundacionnan manera Stichting Scubblebubbles, Turtugaruba, Stichting Fundacion Proteccion y Conservacion di Commandeursbaai y Vecindario ademas di Aruba Birdlife Conservation 14 di maart ultimo a entama un caso contra Land Aruba y J.O.B Holding & Management V.B.A entregando un bezwaarschrift pa asina ey prohibi na Aruba Ocean Villas (AOV) realisa cualkier trabou, incluyendo limpiesa, na Isla di Oro of rond di Isla di Oro.

Diabierna 5 di april a trata na corte e caso unda a sali na cla cu e desaroyado no tabatin ni un tipo di permiso pa e trabounan na Isla di Oro, sino cu a pidi e permiso despues cu a haya e ordemaatregel ademas cu e desaroyado den un entrevista na otro medio local a señala cu nan kier a traha un beach, basha santo full ariba e rif, pone palapanan, mata di coco, haci un area caminda turistanan por bishita e luga aki.

Abogado di Fundacion Parke Nacional Aruba (FPNA) Zuhaila Arendsz den un articulo cu Bon Dia Aruba a publica 7 di april ultimo a destaca cu conforme ley, e plannan ey ta den contra di e destinacion di e area unda tin tres factor cu ta hunga un papel importante como por ehemplo, ta un rif, ta un parke natural riba tera cu mangelnan y e otro parti rond di dje cu ta e area marino, lo cual ta nifica cu ta un area hopi importante cu mester haya proteccion, ademas ley ta indica cu den area tampoco mag tin ningun funcion pa actividadnan turistico of actividadnan comercial.

E caso 5 di april na corte a stop, debi cu e abogado V.M Emerencia di Land Aruba a sinti cu e hues A.H.M. van de Leur no ta imparcial y el a pidi pa wraak e hues, loke ta nifica un “recusacion hudicial” den idioma papiamento.

Segun e proces verbal di e caso aki, cu Bon Dia Aruba ta dispone di dje e hues van de Leur referiendo na e parti cu Land Aruba a sigura cu nan no lo extende e parcela erfpacht na 2026, hues a declara cu “pa hopi biaha a experimenta y a mira cu Land Aruba ta tuma decisionnan contra ley.”

A base di e comentario aki, abogado Emerencia a señala cu “hues a mustra su parcialidad contra Land Aruba” y pa e motibo ey a pidi pa wraak e hues van de Leur.

Dia 15 di april ultimo tres hues di HOF a bari for di mesa e argumento di Land Aruba y e caso a sigui cu e mesun hues mr. A.H.M van de Leur.

FPNA ta un institucion cu ta esforsa pa protege y gestiona varios reserva natural na Aruba, den e caso aki otro fundacionnan a uni na dje pa sigui cu e compromiso di proteccion di naturalesa na Aruba tanto riba tera como den lama.

E area aki ta rekeri un mayor grado di proteccion debi na balornan natural y ecologico presente, mediante un Landsbesluit di dia 15 di juli 2020 a nombra ACF como gerente di diferente area cu e fin di preserva e diversidad biologico y e beyesa natural tanto di flora como di e fauna di Aruba.

FPNA tambe a pidi na hues pa Land Aruba no duna e parcela aki back den erfpacht pa motibo cu e erfpacht di e parcela aki ta termina na 2026, algo cu e hues a tuma den consideracion y a honra e peticion aki prohibiendo extende e derecho erfpacht riba e parcela di Isla di Oro e cual ta caduca na februari 2026.

Ta prohibi na JOB realisa cualkier tipo di trabounan riba of rond di isla di oro sin haya un permiso di construccion di e minister concerni.

Di su parti, AOV su punto di bista tabata ta cu e tereno ta di nan, nan a cumpr’e erfpacht, cu nan tin derecho di ehecuta nan actividadnan na unda a sigura cu ta bay ta di minimo impacto pa medio ambiente, eco-friendly, cu palapa, mata di coco, solar panel, den su perspectiva di bista, e ta haya cu esey ta suficiente pa no haci daño na e area, pero FPNA tabata di opinion cu esey no ta e caso, “e actividad ey no ta di minimo impacto, al contrario, ta haci hopi daño y FPNA a referi tambe na dos rapport cu a haci, un prome cu AOV a pone su bungalows eynan, con e area tabata y a haci un investigacion awor, unda bo ta wak cu e area unda e bungalows ta a wordo destrui completamente, full ecosistema ta bayendo atras cu stapnan hopi grandi, caminda ya e mangelnan a cuminsa bira menos, tin hopi algia rond pasobra e sistema no por limpia su mes, e PH di e awa a bira demasiado halto, bo ta mira cu e impacto humano tambe ta bay causa consecuencia na Isla di Oro tambe ora lo cuminsa haci actividadnan eynan,” el a sigura.