Fundacion ‘Bridging the Natural Bridge’, despues di haci trabou tras di cortina pa establece un Natural Bridge nobo, a firma un acuerdo cu AIB Bank N.V. pa cuminsa ehecuta e proyecto. Asina un comunicado di e fundacion ta informa.
E fecha 2 di september 2005 ta un fecha cu Aruba semper lo recorda. Riba e dia aki Aruba su Natural Bridge a cay den otro. Noticia di e collapse a atrae hopi local na e sitio pa mira loke a resta di un atraccion hopi popular riba nos isla.
Aruba su Natural Bridge, cu tabata un pida di un cueba antiguo forma di piedra coral, tabata midi 7.6 m halto y 30 m largo. Miles di turista tabata crusa e brug tur aña y keda asombra pa su bunitesa. Pa hopi aña Aruba a uza e imagen di Aruba su Natural Bridge pa promove nos isla. Te dia di awe turista y local ta keda bishita e sitio.
Ta for di un tempo caba tin un grupo ta trahando intensivamente hunto tras di cortina pa por realisa un proyecto pa reestablece e sitio aki como un atraccion na e brug natural aki.
E idea pa e proyecto aki a sali di e comandante di Marinierskazerne. E proyecto ta encera construccion di un brug publico nobo y innovativo, cu materialnan duradero cu por wordo instala riba e Natural Bridge derumba actual. E ta representa un brug entre pasado y presente.
Pa realisa e proyecto a establece un fundacion cu e meta pa crea un atraccion adicional na e Natural Bridge. E proyecto aki lo contribui na e desaroyo social economico di nos isla.
Despues di a consulta cu gobierno riba e importancia di establece un sosten inicial pa realisacion di e proyecto, e fundacion a acerca AIB pa asisti y sostene e fundacion cu su experticio extenso den maneha proyecto.
Pa por duna inicio formal na e proyecto aki y pa pusha den direccion di ehecucion, recientemente 21 di juni 2019 e fundacion ‘Bridging the Natural Bridge’ a firma un Memorandum of Understanding cu AIB Bank N.V. (AIB) pa maneha e ehecucion di e proyecto Natural Bridge. E brug nobo lo ta solamente pa peaton y ta bay por carga aproximadamente 500 persona. Turista y local lo por contempla y admira e bunita brug nobo, e Natural Bridge original y paisahe rond di e Natural Bridge.
