Nathaly Maduro di Santa Rosa: Cu registro por haya miho informacion kico hende ta produciendo

Durante un entrevista cu Nathaly Maduro, director di Santa Rosa, el a splica cu despues di un temporada cu tabatin problema di scarsedad di awa y trucknan cu tabata saca awa di dam, na e momentonan aki – despues di e temporada ultimo cu tabatin basta yobida – tur di nan ta full capacidad caba.

Maduro a duna di conoce cu pa evita cierto abuso cu tabata tuma luga, cu trucknan di septic of cierto trucknan di construccion, nan a laga cera algun dam, unda cu ora cu nan tabata bashi a pone baranan di hero pa identifica te na unda hende ta permiti pa uza pa awa.

Aworaki nan tin un seis dam cu ta haciendo uzo di dje, y e otro ta cera cu piedra cu a pone cu colaboracion di DOW, pa asina por haci miho uzo posibel di awa.

Tambe, Maduro a duna di conoce cu nan ta conscientisando e cunukeronan, pa ora cu awa yobe nan tambe por purba colecta awa, pa asina durante e temporada cu ta bay tin secura atrobe, nan por tin awa pa sigui cu nan produccion.

Maduro a bisa cu a haya cierto malesanan durante e temporada di secura, pa motibo cu e matanan ta bira vulnerabel, pero na e momentonan aki nan no tin problema. Di mesun manera el a sigura cu criadonan tambe ta contento, pa motibo cu tambe tin yerba varios caminda. “Tanten cu tin awa, hopi biaha hende ta contento pa e trabounan por sigui’, Maduro a manifesta.

Pa locual ta Santa Rosa, el a señala cu aworaki nan ta bezig cu diferente comisionnan como parti di terenonan y esun cu ta huur tambe, pa motibo cu nan ta finalisando e maneho riba e ROPV. Aunke no ta algo cu ta cay directamente bou Santa Rosa, pero el a comenta cu nan tin cu duna cierto conseho na e comisionnan pa locual ta e parti di maneho y cierto leynan.

Maduro a comenta cu como parti di ondersteuning di DIP su contractnan pa huur front, Santa Rosa a cuminsa bira hopi mas stricto pa locual ta e uzo y huur di tereno. Tin un ley di medio ambiente cu mester tene na cuenta cune na e momento di rosa, por ehempel, cu mester pidi cierto permiso.

Di loke ta trata e uzo mes di e terenonan, pa hende por haya servicio di Santa Rosa, nan ta pidiendo tur usuario di terenonan pa registra y tambe bay cu nan documentonan pa mustra cu e terenonan ta riba nan nomber. Haciendo esey nan tin calcula pa haya miho informacion di ken tur ta produciendo y kico nan ta produciendo.

Maduro a haci enfasis cu nan no ta enfoca riba e parti financiero. Locual nan ta wak ta e cantidad di produccion cu ta presenta, pa purba di haya mas dato di kico ta e problemanan cu ta hayando. “E parti bon ta cu nos ta bay habri aña 2020 cu mas dato, cu nos por studia y nos por presenta na Gobierno”, el a sigura.

Tambe Maduro a trece dilanti cu pa 2020 nan ta enfoca riba mas tayer. Nan ta bezig cu un compania di Surinam, un cooperativa di diferente proyecto hidroponico cu na ta bay haci un siman di tayer intenso pa esunnan cu ta interesa di siña.

Di otro banda, tin tambe cierto partner di Corsou y Boneiro cu lo kier invita pa presenta y comparti proyecto cu ta haci. E miho practicanan di otro isla y cu nan tambe como Santa Rosa nan por introduci sistemanan nobo pa esunnan cu tin deseo pa planta.

Pa finalisa, durante un conferencia di prensa cu Santa Rosa a ofrece diabierna pasa, a duna di conoce e evento denomina ‘Chritsmas Bazaar the Southside’ cu e intencion pa esaki por bira un celebracion unda henter comunidad di Aruba por asisti hunto, cunukeronan, criadonan, piscadonan lo asisti pa asina por cera un aña cu a cuminsa cu hopi desafio.

Chritsmas Bazaar lo tuma luga dia 7 di december na San Nicolas, riba Plasa Lolita desde 6or di atardi te 11or di anochi. Aki ta bay transforma e area cu ambiente y e lo haya diferente platonan navideño, cuminda local, diferente artesania hunto cu ambiente musical.

Di mesun manera, Randy Maduro vocero di Santa Rosa a informa cu e dia ey nan ta bay reconoce seis baluarte cu e entrega di un reconocimento cu ta piscado, criado y plantado.