No ta un tarea facil pa fundacion Centro di Famia di Criansa por haya famia den comunidad cu kier asumi e responsabilidad di bira famia di criansa. E tarea aki no ta crea diferencia entre famia heterosexual, kiermen di sexo diferente of esun di e mesun sexo.
Trahado social di e fundacion aki, Nathalie Tromp, a declara na Bon Dia Aruba cu nan ta habri riba e punto aki. “Nos ta habri pa e pareha di e mesun sexo. Si ta hende muhe of si ta hende homber.”
E fundacion aki ta busca famia cu un bida stabiel cu kier ofrece muchanan cu a pasa den abuso y maltrato un hogar pa e temporada cu nan tin mester. Tromp a bisa cu e punto aki ta masha importante. Esaki kiermen cu por ehempel awor cu nos ta pasando den e crisis di Covid, bo famia mester ta suficientemente stabiel cu no ta haci dificil pa bo por cuida di e mucha.
Tur famia cu ta solicita ta pasa den e mesun proceso di screening pa e fundacion sa cu e mucha ta safe. E ta consisti di cuater parti, entre nan e ta inclui formulario di informacion, y tambe bishita na cas. Tambe e fundacion aki ta ofrece curso pa esunnan cu kier bira famia di criansa, caminda nan ta haya informacion riba nan tarea y responsabilidad. E anochi di informacion aki ta un scenario pa e trahado social por observa e puntonan cu e famianan of personanan mester di mas guia den dje.
Tin cierto rekisito pa bira famia di criansa, ya cu pa e fundacion aki e mucha ta keda central. E mester ta un famia biba na Aruba, ya cu e mucha ta keda den contacto cu nan famia biologico. Tambe nan mester ta un famia ariba 21 aña di edad. E no ta importa su estado civil, ya sea soltero. E por ta un famia cu ta compaña of casa. Tampoco ta importa si nan tin yiu of no. Pero fundamentalmente e mester ta un famia cu no tin problema cu husticia. Nan mester ta habri pa ricibi guia tambe.
Nan ta muchanan di cero te cu 18 aña. Tin diferente factor cu por hunga un rol cu no tur famia kier asumi e compromiso y responsabilidad di bira famia di criansa pa muchanan cu a pasa den situacion dificil. Entre otro cu costo di bida a bira caro y tambe awendia famia a bira mas chikito.
