(AP) — E persona arma cu a tira mata tres studiante y tres miembro di personal na un scol Cristian na Nashville legalmente a cumpra siete arma den añanan recien y a sconde e armanan for di su mayornan prome cu ehecuta e atake door di tira indiscriminadamente riba e victimanan y lansa tiro door di bentana y porta, segun polis a bisa ayera.
E violencia dialuna na The Covenant School tabata e tiramento na scol mas recien cu a sacudi e nacion y tabata planea cautelosamente. E asesino, nombra den medionan Mericano como e “Nashville shooter”, a pinta un mapa detaya di e scol, incluyendo puntonan potencial di entrada y a vigila e edificio prome cu ehecuta e masacre, segun autoridadnan.
E sospechoso, Audrey Hale, 28, tabata un ex-alumno di e scol. Hale no a enfoca riba victima specifico – entre nan tres mucha di 9 aña y e cabesante di e scol – sino a enfoca riba “e scol aki, e edificio di iglesia aki,” segun vocero di polis, Don Aaron a bisa na un conferencia di prensa ayera.
Hale tabata ricibiendo tratamento medico pa un desorden emocional no revela, y no tabata conoci pa polis prome cu e atake, segun hefe di polis Metropolitano di Nashville, John Drake a bisa durante un conferencia di prensa. Si polis tabata sa cu Hale tabatin pensamento suicida of homicida, “e ora nos lo a purba di confisca e armanan,” Drake a bisa, pero “nos no tabatin absolutamente ningun idea ken e persona tabata of si e tabata existi mes.”
Drake a bisa cu e motibo di Hale ta desconoci, agregando cu e ta kere cu e asesino tabatin “algun resentimiento di mester a bay e scol ey.” Durante e conferencia di prensa, Drake a descibi “varios texto skirbi pa Hale” cu ta menciona otro sitionan na The Covenant School.
Contestando durante un audiencia den Senado si Departamento di Husticia lo habri un investigacion si e tiramento tabata un crimen di odio contra Cristiannan, Procurador General, Merrick Garland a bisa cu oficialnan federal tabata trahando cu polis local pa identifica un motibo.
Imagennan di video ta mustra tres agente di polis buscando den cada klas un pa un, anunciando nan mes como polis. Despues ta mustra nan drenta area di lobby, sigui pa tiramento y un agente cu a grita dos biaha “kita bo man for di e arma.” Despues por mira e asesino inmobil riba vloer.
Polis a duna informacion no cla riba genero di Hale. Pa varios ora dialuna, polis a identifica e asesino como un muhe. Despues, hefe di polis a bisa cu Hale ta transgenero. Despues di e conferencia di prensa, Aaron a nenga di elabora riba con Hale tabata identifica. Den un e-mail ayera, vocero di polis Kristin Mumford a bisa cu Hale “a keda asigna como femenino na su nacemento. Hale tabata usa pronombre masculino riba su perfil di rednan social.” Despues na e conferencia ayera, Drake a referi na Hale cu pronombre femenino.
Autoridadnan a identifica e muchanan fayecido como Evelyn Dieckhaus, Hallie Scruggs y William Kinney. E adultonan tabata Cynthia Peak, 61, Katherine Koonce, 60, y Mike Hill, 61.
Website di e scol funda na 2010 ta lista Katherine Koonce como cabesante. Peak tabata un maestro substituto y Hill tabata un custodio, segun investigadornan.
