E ciudadnan mas importante rond di mundo ta orguyoso di tin museonan cu e miho obra di arte na nivel mundial, pero tambe tin espacio pa generacionnan nobo siña hunga cu colornan, forma y experiencia sensorial: museo pa muchanan.

Por ehemplo, na New York, Brooklyn Children’s Museum a ser crea na 1899 pa educa e muchanan riba variedad di cultura y promove respet pa su bisiñanan, tabata e prome museum di su especie rond di mundo.

Pronto Aruba lo conoce su mesun museo pa mucha “Aruba Museum of Play” na unda tur cos lo ta “hands-on” y interactivo, e muchanan lo por explora e museo na nan mesun tempo y na nan mesun manera hunto cu nan mayornan, famianan y amigonan. E muchanan por mishi, hunga, subi, kruip y experimenta den cada un di e exhibishonan cu lo tin den e museo.

Durante un entrevista special cu Bon Dia Aruba a tene cu Naomi Werleman-Richards, miembro di Stichting Aruba Museum of Play, el a splica cu esaki lo bay ta un museo pa mucha desde baby te cu 12 aña di edad.

Werleman a trece dilanti cu esaki ta un luga manera tur hende sa un museo ta un luga na unda hende ta drenta y no mag di mishi cu nada, pero esaki ta bay ta un luga pa muchanan unda por medio di hunga por siña cos, lo tin area cu awa, planta mata, area di subi y baha, dress up area pa asina yuda muchanan desaroya habilidadnan fundamental, stimula nan creatividad, curiosidad y ta duna nan e gana pa siña cual nan lo hiba cu nan pa resto di nan bida.

Tambe, Werleman a comenta cu un co-fundador di e museo, Reuella Berg a bishita un museo pa mucha na Charleston South Carolina na 2018 cu su 2 yuinan. Eynan nan por a mira con e muchanan a disfruta henter un mainta y alavez a siña den diferente area manera arte, sciencia, humanidad, y tur esakinan den un ambiente crea specialmente pa nan. For di eynan a bin cu e idea pa trece algo asina na Aruba pa asina tur mucha na Aruba tambe por experencia algo unico crea pa nan.

Asina mes, Werleman a expresa cu na 2019 a cuminsa cana e caminda pa wak con por hasi esaki un realidad pa Aruba y na November 2019 e fundacion “Aruba Museum of Play” a wordo funda oficialmente. E fundacion ta conta cu un directiva di 7 persona local y dispuesto pa traha pa asina por realisa e proyecto aki pa tur e muchanan di Aruba.

Ademas, e fundacion ya caba ta forma parti di e “Association of Children’s Museum” cu actualmente tin 425 museo di mucha na 20 diferente pais y cu ta comparti nan experencia, conocemento y ta yuda otro pa asina realisa mas museo di mucha den mas pais rond di mundo.

Na e momentonan aki, Werleman a duna di conoce cu nan ta bezig cu comerciantenan of algun otro persona cu tin interes pa bira realidad e proyecto aki, te awor nan tin e localidad, pero nan ta den tramite pa remodela y rediseña esey, nan mester di sponsors cu lo desea di participa den esaki.

“Esaki ta hopi great, pasobra ta pa muchanan y pa famia, un luga cu ta haci hopi falta aki na Aruba”, Werleman a declara, y tambe el a comenta cu di e manera aki e famianan por sali y haci algo hunto.

Di mesun manera, el a bisa cu ta hopi importante pa stimula e muchanan pa pensa, pa ta creativo y esey ta un area cu e ta kere cu nan lo beneficia di esaki den futuro , duna pa e muchanan e deseo pa siña cosnan nobo.