(AP) – Ademas di duna e premio cual lo ta den efectivo pa por yuda Haiti despues di e teremoto cu a devasta e pais, e celebridad den e mundo di deporte, specificamente tennis, a declara cu e tin plan di yuda hopi mas.

“Mi ta sinti manera cu mi no ta haciendo suficiente,” Osaka a expresa riba dialuna. “Mi ta purbando di investiga kico mas mi por haci. E donacion di e premio ta e prome cos cu mi a pensa cu mi por haci pa por trece e cantidad di enfoke mas grandi riba loke a sosode, y esey ta e motibo dicon mi a anuncia mi donacion publicamente.”

Un teremoto cu un magnitud di 7.2 a devasta e pais riba diasabra, cu un cantidad di morto cu ta estima di ta 1,400.

Riba diasabra anochi, Osaka a haci su decision di duna e premio den donacion publico riba su cuenta di e red social Twitter. E premio en cuestion, ta placa cu e lo por gana den e siman aki su torneo Open Tune-up Tournament na Ohio.

Osaka, ken tin un tata Haitiano y un mama Hapones, tin un wega den e comienso na Cincinnati. E lo ta hungando contra e ganador di diamars su wega entre Coco Gauff y Hsieh Su-Wei.

Ora cu a puntra Naomi tocante Haiti durante dialuna su conferencia di prensa, Osaka a bira emocional y mester a tuma un momento pa su mes na banda prome cu e bin bek pa contesta mas pregunta.

Haiti te ainda ta lidiando cu e problemanan causa pa e asesinato di su President Jovenel Moise cual a tuma luga luna pasa y awo e efectonan di un tormenta tropical cual ta poniendo dificultad den e proceso di recuperacion di e teremoto.

“E ta algo dificil di pasa aden,” Osaka a bisa. “Mi ta wak e noticia tur dia, y honestamente e teremoto tabata serca di mi mayornan su scol ayanan, kiermen honestamente mi no sa con e situacion ta y te ainda mi no a wak ningun video ni potret di su estado actual.”

Osaka, ken tabatin e posicion number 2 mundialmente, a caba di gana e di dos torneo grandi di su carera e Australian Open anteriormente e aña aki, pero a retira for di e French Open y Wimbledon pa causa di preocupacionnan cu su salud mental.

“E tabata algo cu mi mester a haci pa mi mes,” Osaka a bisa. “Mi tabata sinti untiki berguensa di bini bek den publico pa motibo cu mi no tabata sa si hende lo wak mi di un manera diferente. E factor mas grandi cu a habri mi wowo tabata e Olimpiada y ora cu e otro atletanan tabata acerca mi persona y bisami cu nan tabata hopi contento cu mi a tuma e decision ey. Mi ta hopi orguyoso di mi mes.”

Osaka tambe a bisa cu el a acerca y contacta e atleta di Olimpiada di Merca Simone Biles, ken a retira di e final den Tokyo pa e categoria di Merca su ekipo femenino pa su propio salud mental y brinda su persona apoyo.

“Mi a manda Simone Biles un mensahe,” Osaka a conta. “Pero tambe mi tabata kier a duna Simone su espacio pa motibo cu mi sa con e procesonan aki por abruma bo.”