Nan tur ta horta?

Awor si mi no sa mas pa ken vota. Un expresion hopi comun den e dianan aki, mas tanto di hende cu na 2013 ainda a pone tur nan confiansa den e partido actualmente den gobierno. Loke tin e hendenan aki totalmente confundi, no ta loke e gobierno aki a haci o keda sin haci riba terenonan comun gubernamental.

Tin hende cu ta critica gobierno pasobra nan a regla e asunto di pension general (AOV), pasobra esey a implica cu aki 7 aña edad di bay cu pension lo ta 65 aña. Igualmente lo tin hopi hende cu ta satisfecho cu por fin e asunto aki a keda regla, despues cu instancianan internacional y gobierno Hulandes no tabata stop di maha den nos cabes pa nos por fin regla e cos ey. Igualmente e areglo pa paga pa nos gastonan medico, cu di tur manera semper ta bin di nos cartera, pasobra ningun gobierno na mundo tin un cartera di su mes; ta nos ta paga. Pero tur e medidanan aki, tuma pa bon o mal motibo, a costa nos bastante di nos entrada cu nos ta resta fin di luna. Ta berdad cu segun cifranan di Oficina Central di Estadistica no tabatin un inflacion fuerte den e ultimo añanan. Loke ta completamente logico si e consumo priva total a bira mas debil, a base di tur e placa cu nos no ta ricibi mas na fin di luna, plus loke nos ta paga extra ora nos drenta e supermercado of tienda. Djis conta 3% como empleado cu bo mester entrega na pension obligatorio, mas 2% di AOV di cual un ta pa bo. Riba esaki e 2% di BAZV cu a bin compaña e BBO. Si bo tin un economia cu ta bayendo di tres aña sigui den recesion, cu poco espacio pa aumenta entrada den henter economia, no ta algo cu ta haci bo alegre. Pero por argumenta cu e medidanan aki tabata necesario pa cubri e gastonan mas prioritario den nos comunidad, cu manera a bisa caba, ta nos mester paga gobierno ta kita placa di nos pa paga e cuentanan aki.

Riba otro tereno tambe nos por haya e mesun tipo di discusion aki. Esun ta haya cu e caretera pa San Nicolas tabata necesario, otro no. Nos mester a gasta tanto placa den renobacion di hospital? Atrobe e opinion ta varia, aunke poco hende lo bisa cu e situacion mester a djis keda manera cu e tabata. Hospital nobo o hospital renoba, gobierno actua pero sin corupcion por fabor. Mester traha un ringweg ainda, despues cu 40 aña largo nos no tabata conta cu ne? Atrobe e opinionnan ta varia, aunke poco lo insisti cu no mester haci nada. Traspaso di haf di container pa Barcadera, igualmente. Lastima cu e ubicacion na Barcadera no ta duna ningun posibilidad pa acomoda e barconan di container ultra grandi di futuro, pero cu e containernan a disparce di haf di Playa, ta bon pa Playa y Barcadera.

No ta nada straño anto cu e medionan di comunicacion cu ta apoya actual gobierno completamente, ta argumenta continuamente cu mester a haci debe pa drecha economia, den sentido di shoot me, I already did it. Naturalmente di otro banda lo argumenta, cu practicamente no a inverti dentro di presupuesto, pero cu e prestamonan ey fuera di presupuesto ta bin persigui nos ainda den e decadanan venidero. Aki tambe ta cosnan cu ta cuestion di opinion tocante maneho. Nos tambe ta haci bon uzo di e derecho pa opina den esaki.

Pero ban bolbe na e preocupacion expresa na inicio di e editorial aki. Tur loke nos a trece dilanti aki, di opinion y argumento tocante kico gobierno mester o no mester a haci, no ta e motibo di e preocupacion y confusion. Loke tin e hendenan aki asina, ta e noticianan cada biaha mas fuerte y casi no por nenga di corupcion coordina y organisa na e nivel mas halto den gobernacion. Hende ta cuminsa realisa cu ta papia aki di un berdadero makinaria di corupcion, unda miyones a ser gana y reparti di manera criminal, envolviendo ciudadano comun, empresario grandi y chikito, tramitador di permiso, funcionario publico na tur nivel, hasta esunnan mas halto, cu mester ta ehemplo di conducta etico. Esaki ta loke haci hopi hende mal contento, pasobra nan ta realisa cu aki a toca alma y curason di nos comunidad: delincuencia den seno di e organismo cu mester duna proteccion na comunidad contra e maldad aki, y no al contrario ta responsabel pa organisa esaki, o den e menor di e caso, di tabata sa pero a laga e cancer perverso aki sigui come nos paden. Esey ta loke ta molestia y angustia e ciudadano corecto, cu na 2013 a duna e actual gobierno un oportunidad pa demostra kico nan por, pero no pa yega na e corupcion mas salvahe cu e pais a conoce.

Claro cu tin esunnan cu ta bisa: Ay, ta tur ta horta, anto  ami ta bolbe vota pa nan. E punto no ta si tur ta horta, pero si nos kier pone un paro na esaki, pa bon di nos yiunan cu mester lanta den e pais aki.