Ayera tabata e dia cu a tene condolencia pa Rishandroh y Roshandrick na Ad Patres Funeral Home. Alabes ayera un par di ora prome cu e condolencia a tuma luga, Ministerio Publico (OM) a laga e wela liber pasobra segun OM, e tambe tabata un victima y no a comete ningun echo castigabel. Mientrastanto e mama y padrastro deteni ta na warda di polis, wardando pa wordo transporta pa KIA. Awe ta dia nacional di luto y lo tuma luga e entiero di ambos mucha.

E caso cu a haya e nomber ‘speeltuin’ den boca di husticia a wordo di un manera of otro adopta pa comunidad. E caso grave aki a bin ta representa tanto e fayo cu tabatin den comunidad pa ora mira algo, bisa algo, como e situacion alarmante cu tin riba tereno social. Sinembargo e problemanan cu a bin na luz despues cu e dos muchanan mester a sufri maltrato te na morto ta multifacetico. Manera ciudadano Atan Lee a expresa cu elocuencia durante un caminata silencioso pa recauda fondo pa e gastonan relaciona cu deramento di e muchanan, ‘e mucha(nan) aki no ta merece di ta un martir’.

Sr. Lee a referi na e echo cu a tuma algo asina doloroso pa spierta tanto comunidad como instancianan gubernamental pa tene mas cuenta cu problemanan social y casonan di abuso di mucha.

Wela ta wordo laga liber

Riba diasabra 25 di november ultimo e wela (L.C.F.) di e muchanan fayecido a wordo deteni riba sospecho di complicidad na maltrato severo di e dos muchanan, cu morto como consecuencia. Despues di a evalua esaki Ministerio Publico a declara den un comunicado cu no por mantene e wela den detencion pasobra OM no a haya cu e a comete un echo castigabel. E complicidad segun OM lo a encera cu e wela no a actua mientras e tabatin conocemento di e maltrato severo. Despues di investigacion cuidadoso, OM a yega na e conclusion cu no tin ningun motibo pa supone cu e wela a haci su mes culpabel na cualkier tipo di hecho castigabel.

Pa e motibo ey, OM no a pidi hues comisario pa prolonga detencion di e wela y a pone den libertad. OM a expresa di ta consciente cu e morto di Rishandroh y Roshandrick a lanta hopi emocion den comunidad Arubano. Pa e motibo aki OM ta spera cu e wela lo wordo laga na paz. ‘E tambe ta victima den e caso aki y mientrastanto e no ta sospechoso mas’, vocero di OM a conclui den su relato.

Fiscal no ta tene cuenta cu nada mas cu ley segun OM

Nos redaccion a tuma nota di un peticion cu ta circulando riba medionan social pa recauda firma. E firmanan segun nos a comprende ta pa exigi fiscal y husticia pa pone e malhechornan sinta nan castigo na Aruba. Tambe pa exigi un castigo maximo pa comete e delitonan. E sospechosonan principal den e caso aki actualmente ta e mama y e padrastro di Rishandroh y Roshandrick, despues cu e wela di e muchanan a wordo laga liber. Nos a purba tuma contacto cu e persona cu a cuminsa e peticion aki pero nos no a logra haya sa dicon specificamente ta purba bringa e mayornan di e muchanan. Mescos cu OM a bisa, emocionnan ta halto y ta comprendibel cu lo tin rabia contra e mayornan.

Sinembargo nos a puntra vocero di OM Ann Angela riba e punto aki, di cual su contesta tabata cu fiscal tambe a tuma nota di e peticion circulando. Pero segun e vocero, ‘fiscal ta tene cuenta cu loke ley ta bisa solamente. No ta tene cuenta cu nada otro na ningun manera of forma’. Sra. Angela a agrega cu personalmente e no ta compronde bon e afan rond di Hulanda.

Vocero di OM a clarifica cu tin mas hende sintando detencion of castigo na Hulanda of St. Maarten pa sea nan propio siguridad of di otro. “Hendenan cu castigo hopi largo pa asesinato nos tin na Hulanda. Pais Aruba tin cu garantisa siguridad di hende, te hasta si nan ta presonan of detenidonan.”

Despues di a consulta cu fiscal e vocero a splica cu e mama y tata di e muchanan ta wordo deteni na warda di polis, ‘pero nan lo bay wordo hiba KIA dentro di un tempo’. Con OM ta evalua ora ta considera cu bida di persona ta poni den peliger y ta dicidi pa move e persona sea pa St. Maarten of Hulanda e vocero a nenga di comenta riba dje. “Esaki ta prematuro den e caso. Laga e investigacion cana. Pa awo nan ta den cel di polis y djey nan lo bay KIA. Cualkier cos cu sali, lo informa riba dje.”

Castigo adicional den caso di maltrato cu ta conduci na morto

Sinembargo ta posibel cu e grupo di hende cu ta rabia y kier firma e peticion cu ta circulando lo haya nan deseo toch. Despues di a tuma nota di un anecdota riba pagina di Facebook di Canwood Legal, redaccion a puntra vocero di OM tocante esaki. E nota di Canwood Legal tabata trece claridad riba e diferente tipo di delito cu ta wordo cometi na costo di bida di un persona. Den ley tin distincion ora ta trata di asesinato cu intencion, sin intencion y maltrato cu a conduci na morto, entre otro. Apart di esaki ta menciona cu den caso cu ta papia di maltrato cu a conduci na morto, si mama, tata, yiu of casa ta comete esaki e castigo por wordo hisa cu un tercer (1/3) parti di e castigo.

Segun e vocero, ‘ley ta bisa pa loke ta e diferente formanan di maltrato cual entre nan: maltrato severo cu morto como consecuencia cu ora ta trata di hende su mesun yiu, te hasta stiefkind, ta bin 1/3 parti riba e castigo’. Sinembargo ora ta trata di un crimen contra bida manera asesinato of homicidio, ley no ta inclui esaki. “Pues si e cay bou maltrato, e ora ey ta bin 1/3 extra. Si e intencion ta pa mata, e castigo no ta bin ariba.”

Den e caso di speeltuin, “nos a menciona caba e maltrato severo cu morto como homicidio. Mescos pa mama y tata, aunke pa e tata ta bin acerca e maltrato di e mama. Y pa e mama cu el a laga e muchanan den estado desampara.”

Actualmente OM ta enfocando riba haya sa kico a pasa precisamente, kico ta e berdad y busca husticia na momento cu esaki wordo conoci.

Condolencia pa Roshandrick y Rishandroh

Redaccion tabata presente na e condolencia cu a tuma luga na Ad Patres Funeral Home na San Nicolas pa familiarnan y conocinan. Nos a tuma nota di e sintimento cu tabata reina den e edificio. Varios persona cerca na e famia y te hasta familiarnan a nenga di comenta. Un persona en particular a splica cu ‘mi no kier papia pasobra sigur mi lo yora’. Sinembargo e wela di parti di tata di e muchanan Marie Anastacia cu recien a bin bek di Merca a comenta na Bon Dia cu ‘mi ta spera algo asina nunca mas sosode na Aruba’.

Pa e famia, sra. Anastacia a expresa cu nan ta bayendo den temponan di ‘hopi, pero hopi dolor’. Sinembargo e no por descarta cu tabatin complicacion den e famia. “Semper e mama tabata kier e yiunan cerca dje, y ami tabata kier e yiunan cerca mi. Nos semper tabata den pleito p’esey. Ora mi mester a bay afo pa opera a laga e yiunan cu e otro wela.” E motibo cu e mama kier a keda cu e yiunan maske situacion financiero riba nan so tabata dificil ta pasobra el a bira 18 aña y e tabatin deseo di keda voogd di su yiunan, segun sra. Anastacia.

Sra. Anastacia a splica cu por ehempel den aspecto financiero e tabata contribui basta y tabata haci esaki cu mil amor. “Pero bo ta duna placa e siman aki y otro siman bo ta tende cu no tin pampers y no tin lechi. Nos tur tabata rabia. E tanta semper tabata keda pendiente cu nan y si algo pasa e ta bisa nos pa coordina pa busca e muchanan.”

Sra. Anastacia ta lamenta cu semper tabatin problema cu duna yudansa na e muchanan. Tambe cu e mama no kier a tende di nan. “Con cu bay bin ami tin un dak, un pan pa nan y nan ta dos yiu cu mi a stima masha hopi mes. Pa motibo cu nan tabata e muchanan cu mas necesidad den e famia.”

Sra. Anastacia a conclui bisando cu lagrima na wowo, “loke mi ta straña mas ta cu ora nan tabata bin mi cas y mi tabata cushina pa nan, nan tabata asina contento cu nan bariga por a yena cu nan tabata bisa mi danki Fifi. Pasobra nan no por pronuncia mi nomber di cariño Fufu. Esey ta mata mi cada momento si. E ta haci hopi hopi hopi dolor.”