Nan kier keda afo di discusion cu Hulanda; Sindicatonan ta contesta carta ultimatum di gobierno

Ayera 10 di januari sindicatonan SIMAR, SEPPA, SADA, SPA y FTA a manda un carta pa gobierno contestando e carta di ultimatum cu gobierno a manda pa e grupo di sindicatonan diasabra 8 di januari. Den e carta aki sindicatonan ta ratifica nan posicion inicial en cuanto e recorte salarial di 12.6% y a indica tambe cu nan kier keda afo di e discusion cu Hulanda.

Den e carta di ultimatum di Gobierno di Aruba pa e sindicatonan, Minister President tabata en espera di un respuesta di parti di e sindicatonan, mas tarda 12or di merdia di ayera 10 di januari, ariba e invitacion extendi na tres representante di e sindicatonan pa acudi na un reunion cu un comision financiero di Gobierno cu lo mester a tuma luga ayera 3or di atardi.

Den nan carta Sindicatonan ta subraya den nan carta tambe cu nan punto di bista pa loke ta trata e recorte salarial di e empleadonan publico ta evidente y no ta cambia, y cu nan kier keda afo di e discusion cu Hulanda.

Josephine Albertus, presidente di SIMAR, ta indica cu e decision pa keda afo di discusion cu Hulanda ta bin pasobra sindicatonan no ta sinta na mesa y dialoga cu Hulanda, na kier sinta cu Gobierno di Aruba. “Cada biaha gobierno ta bisa Hulanda, nos no ta sinta cu Hulanda, nos no ta dialoga cu Hulanda, dus nos no sa kico ta pasa y cada biaha Gobierno ta manera sconde tras di Hulanda.”, el a bisa.

“Pesey nos a bisa nos no ta den esey, nos ta deal cu Aruba, nos ta deal cu nos dunado di trabou. Esey ta loke nos kiermen pasobra den tur cos cu nan haci ta Hulanda, eynan nos ta bisa cu nos no ta eyden pasobra nos no ta sinta na mesa pa sa y si bo tuma nota tur e biahanan Gobierno di Aruba ta bisabo un cos y ora bo tuma nota di Hulanda bo ta scucha of bo ta lesa otro cos”, el a agrega.

E grupo di sindicatonan ta remarca tambe cu aunke nan a indica den cartanan anterior cu nan no ta dispuesto pa forma parti di un comision manera cu Gobierno a propone, “esaki sinembargo no ta bisa nada di e posicion di sindicatonan pa cu e cifras cu Gobierno ta presenta y no por wordo considera tampoco como aceptacion di e sindicatonan cu e informacion cu Gobierno ta duna ta corecto”.

Nan ta enfatisa cu nan lo ricibi cualquier informacion financiero for di Gobierno cu lo por yuda “eventualemente den fihamento di nan punto di bista”.

Sindicatonan a termina nan carta señalando cu ainda nan ta wardando un confirmacion por escrito ariba nan posicion di 5 di januari 2022 y tabata en espera di e confirmacion aki, por escrito, mas tarda pa 4or di atardi di ayera 10 di januari.

Den un video publica ariba e pagina oficial di Facebook di Gabinete Wever-Croes II, Minister President, Sra. Evelyn Wever-Croes, a reacciona ariba e carta di e sindicatonan.

Minister President ta splica den e video cu mirando cu e sindicatonan, SIMAR, SEPPA, SPA, SDA y FTA, a indica cu nan no ta dispuesto pa sinta cu un comision financiero, Gobierno di Aruba ta evalua pa continua cu e deliberacionnan financiero cu e otro sindicatonan cu si a mustra interes.

El a menciona cu Gobierno ta trahando ariba un respuesta por escrito pa e sindicatonan tambe. Segun Minister President a sigui splica, den e carta cu gobierno ta preparando nan ta toca ariba e propisicon cu sindicatonan a haci pa traha dos dia menos pa luna pa compensa locual nan ta entrega cu e recorte di salario.

“E posicion di Gobierno, sigumi ya caba den un carta di 5 di januari, mi a splice kico e posicion ta. Sindicatonan sa miho cu mi mes cu na momento cu abo como un trahado decidí cu bo no ta lanta bay traha awe, e tin consecuencia. Esey ta den sector publico y den sector priva mesun cos. Sindicatonan sa cu unilateralmente ningun empleado por decidí cu e ta cambia su condicionan di trabou of e palabracionnan di trabou”, Minister President a bisa.

El a remarca cu Gobierno ta dispuesto pa considera e proposicion aki di parti di e sindciatonan y cu den e siguiente dianan Gobierno lo prepara e documento den cual nan ta papia di e proposicion, di e consceuncianan y ompacto cu e lo por tin y wak si por logra yega na un solucion.

Minister President a indica cu nan lo ta drentando den negociacion proximamente cu e Secretario di Estado nobo y eynan nan mester di un punto di salida.

“Te ainda nos punto di salida ta cu pa e aña aki ora cu nos no ta depende di sosten di likides mas, pa nos por paga e salario di empleadonan publico y semi-publico completo. Easy ta e punto di salida y nos ta keda lucha pa esey ta asina tambe”, el a agrega.

Por ultimo el a menciona cu Gobierno lo sigui na mesa di dialogo cu e sindicatonan cu si kier dialoga, “pasobra ami ta kere cu ta na mes abo tin cu yega na otro”.