Ultimamente nos por a presencia dos caso unda nos ta mira un ministro haci cierto adaptacion den accionnan loke ta duna speransa cu talbes nan a haya otro opinion. Esey no necesariamente ta asina pero si por mira un cambio di tactica. E prome caso ta esun di nos mandatario di husticia, cu te algun tempo pasa tabata mantene un posicion firme cu tur cos ta oke, aumento di criminalidad ta existi solamente den mente di e ciudadano y cu e tin tur cos bao control.
A base di esey tambe a tuma luga un reduccion di e presupuesto pa 2016 di su ministerio 3 florin miyon, cu su bendicion pasobra nunca ningun hende a tende e ministro keha tocante esaki. Esey significa tambe cu e por bien opera su ministerio bon cu menos placa, loke ta duna e sospecho cu tabatin gastamento di placa innecesario anto. Tampoco e ministro ta conoci como un ‘pushover’ cu ta laga su colega di financia simplemente impone autorisacion sin opone esaki, si e no tabata di acuerdo. E ministro nunca a comenta.
Awor diripiente nos ta haya tende cu e ministro cu hopi afan ta en busca di dies miyon florin cu supuestamente e tabata busca aña pasa caba, y aparentemente no a logra haya esey. E placa extra lo mester sirbi pa servicionan manera bombero, polis y inmigracion por funciona bon. Esaki ta separa di un cincuenta miyon florin pa drecha prizon cu por fin tambe por conta cu e reconocimento di banda di e ministro cu e no por keda asina. “Mas vale tarde que nunca” e expresion Spaño ta bisa pasobra na e altura aki tur hende cu dos placa di sinti sa cu nos prizon ta un desastre y no ultimamente so. Si despues di mas di seis aña porfin e ministro ta bay haci loke e mester a cuminsa haci seis aña pasa, y ta exigi e presupuesto adicional pa por logra esaki, nos lo bisa:”welcome to the real world”; laga arogancia un banda y bay haci e trabao pa cual a nombra bo.
Naturalmente cu ta net e tipo di asunto aki ta causa cu yega na un ‘balanced budget’ otro aña ta bira asina dificil. No ta riba tereno di husticia so gobierno tin añanan ta cremencha, pasobra tabata desperdicia placa di presupuesto na tur sorto di cos innecesario mientras cu ekipamento di e diferente departamentonan di husticia y otro ministerio a keda atras. No ta mucho tempo pasa cu e colega encarga cu enseñansa a bati alarma cu lo mester mas di 200 miyon florin pa renoba scol y cu e ta kere cu por haci esey via un proyecto ‘PPP’.
Pa su mala suerte a caba di sali e opinion di CAFT riba e problema financiero cu e proyectonan PPP a hinca gobierno aden caba y cu no tin espacio pa mas proyecto. Hunto aki nos ta papiando caba mas di un cuarto di biyon florin na inversion necesario pa dos ministerio, y ainda falta…
Esaki ta e cosnan cu ta bin dilanti awor y cu ta haci cu riba papel ta facil pa pone cu otro aña ta yega na solamente 0,5% di deficit y pa 2018 ta yega na un presupuesto balansa, pero ta bira practicamente imposibel cumpli cu esaki.
E otro ehemplo cu nos ta mira unda un ministro ta cambia rumbo ta e caso di ministro encarga cu Infrastructura. Pa basta tempo e no tabata ni reacciona riba e tantisimo casonan cu tabatin den corte unda hues tabata expresa su indignacion cu tanto violacion abierto y sin ningun tipo di berguensa di ley di parti di e ministro aki.
Aparentemente el a scoge prome pa simplemente ignora tur loke ta concerni e ley di Ordenamento Teritorial, inclusivo e asunto di e areanan defini como berde den e ley aki. Awor cu, a base di e ultimo caso di e terenonan na Bubali, cu a bira imposibel pa keda mantene silencio, awor el a scoge pa atake. Su meta ta awor pa bay haci cambio den e ley pa posibilita e otorgamento di e terenonan na esunnan cu el a priminti caba cu nan ta haya esakinan. Por lo menos por bisa cu e ministro awor ta mustra un virtud no descubri y esey ta esun di cumpli cu bo palabra, hasta ora e caso den cual bo ta cumpli por ta cuestionabel.
Pakico mustra tanto lealtad pa e desaroyadonan cu ta pretende traha mas hotel y condominio ainda, y di otro banda no duna cara ora ta trata di e necesidadnan urgente di vivienda di miles di ciudadano? Pakico tanto esfuerso pa acomoda empresanan cu talbes ta bira un problema pasobra nan ta contribui na e exceso di camber turistico di mañan y di otro banda un silencio profundo ora ta trata atende un di e necesidadnan mas grandi cu Aruba tin? Den shete aña nos no a tende mita palabra di e ministro riba e problema aki, solamente nos ta mira intento di acomoda amigo. Por bisa cu e ministro a cambia di tactica, pero no di mentalidad.
