(Univision) – Representantenan di Canada, estadonan uni y Mexico a inicia ayera e di seis ronda di negociacion pa modernisa e tratado di liber comercio di noord America (NAFTA, na Ingles), cual a ser describi pa e delegacion Mexicano como critico pa e posibilidad cu Washington por presenta un carta di retiro di e acuerdo comercial.
Den e anterior negociacionnan, Canada y Mexico a forma frente contra e propuestanan di Merca, manera e clausula pa revisa e acuerdo di NAFTA cada cinco aña y e cambio di e reglanan di origen di producto, cu lo permiti fabrica mas auto den teritorio Mericano.
Sinembargo, na inicio di januari varios fuente Canades a informa agencia Reuters cu presidente Donald Trump lo por uza un tactica legal: presenta un carta di retiro di NAFTA cu no lo laga Merca totalmente for di e acuerdo, pero cu ta pone su tarifanan di importacion na e nivelnan acorda pa e Organisacion Mundial di Comercio (World Trade Organisation; WTO).
Pa motibo di e menasa aki den e buelta nobo, programa di 23 pa 29 di januari, ta anticipa cu e negociadonan di Canada y Mexico lo ta mas flexibel pa cu e proposicionnan di Trump, cu a declara cu NAFTA ta extremadamente inhusto pa Merca y su trahadonan.
E propuestanan cu nan por acepta ta esunnan relaciona cu regla di origen y e parti encuanto resolucion di disputa, e fuentenan a bisa Reuters.
E negociacionnan ta andando apenas algun ora despues cu presidente Donald Trump a anuncia impuesto di importacion pa mashin di laba paña y panel solar, pa beneficia e productornan Mericano. Como reaccion casi inmediato, ministerio (Secretaria) di Economia di Mexico a critica e decision y a sigura cu lo uza tur e recursonan legal pa Merca cumpli cu su obligacionnan internacional encuanto e materia aki, contempla den NAFTA.
