Nadien Phillip Gewichtsconsulent: “Propaganda bo producto pa loke e ta”

Problema grandi den e aspecto di comemento saludabel ta pa personanan compronde netamente kico ta saludabel. Claro cu si un luga conoci pa ‘deep fry’ producto promove esaki como saludabel, e no ta bay yuda educa comunidad riba locual realmente ta bon pa nan salud. Lo tabata miho si e compania a reconoce ki parti di e ‘zeilboot’ saludabel’, e ta pertenece na dje (extra’s), y recomenda hendenan pa come esaki un dia den fin di siman kisas riba ‘cheat day’.

Video controversial
Manera cu e video di KFC a cuminsa pasa na television y a wordo publica riba Facebook el a ricibi cantidad di comentario di personanan haciendo reclamo.

Un di e comentarionan ta: “Ta keda na cada ken kico y cuanto nan ta come, pero esaki ta simplemente “false advertising”. Deep fry galiña y batata den azeta “zero trans fat” no ta haci e cuminda saludabel. No por ta aceptabel cu ta propaganda cu esaki ta saludabel. Ta asina lamentabel cu ta combina e imagen di linear park (algo cu nos mester ta hopi orguyoso di dje, pasobra e ta motiva hopi hende pa haci ehercicio) hunto cu un fast food chain. E ta un insulto pa tur progreso cu Aruba a lucha pe, cu esaki mag di wordo propaganda. Increibel.

Pa esunnan cu no a wak e video, E ta encera un grupo di personanan haciendo movecion riba Linear Park y despues ta bay come na KFC. E propaganda ta finalisa bisando cu awo si bo por come KFC saludabel como cu e azeta cu nan ta uza ta ‘zero transfat’. 

Kico ta cuminda saludabel
Pa un cuminda por wordo considera saludabel, e mester cumpli cu diferente rekisito y no djis ‘zero transfat’.

Cualkier cuminda cu ta comproba cu ta promove y sostene un bon salud pa motibo di su cantidad vital di nutriente, ta wordo yama saludabel. Alabes ta tene cuenta pa banda di e nutriente, e salo, sucu y vet ta abou. Mas bon ehempel ta cumindanan cu ta halto na fibra, vitamina, mineral. Cumindanan cu por reduci colesterol, reduci chens di infeccion y cancer entre otro.

Trans fat
Tumando nota di locual cu ta wordo considera saludabel, bo por compronde awo pakico e ta robes pa un compania label un producto limita na nutriente saludabel, solamente pasobra e azeta lo ta ‘zero trans fat’ (cual tampoco no kiermen cu no tin trans fat).

Trans fat ta mescos cu e ‘partially hydrogenated vegetable oil’ cu bo ta lesa den e lista di ingrediente riba e label di e producto. Trans fat no tin ningun beneficio pa nos curpa, contrario, por causa cantidad di efecto negativo. Sabiendo esaki kisas bo ta puntra bo mes dicon e ta den nos cuminda. Hopi corto splica, e structura di e azeta vegetal ta wordo cambia pa mehora su sabor y mehora e cantidad di tempo cu e producto ta keda bon. (pensa riba tur coy come dushi cu ta halto na trans fat).

Salud – transfat
Vetnan malo manera trans fat y saturated fat (no mes malo cu trans fat) ta hopi malo pa bo nivel di colesterol. E ta hisa e nivel di e mal colesterol LDL y baha esun bon HDL. hopi consumo di vet malo ta asocia cu aumento di riesgo pa sufri di ataca di curason. 

Engaño grandi ‘zero transfat’ 
Un label di un producto por contene trans fat, pero toch imprimi 0 gram di dje riba label. Esaki ta como cu esunnan cu a bin cu e regla di label, a stipula cu si un producto ta contene menos cu 0.5 gram di trans fat, e compania por pone 0 riba e paki. Pues hasta si e producto ta contene 0.4999 gram di trans fat. Tambe importante pa sa ta cu hasta si tin un cantidad imprimi den e informacion di nutricion bo lo no mira e porcentahe recomenda pa consumo diario. Esaki ta como cu no tin un cantidad recomenda di trans fat den un dieta diario, como cu e ta malo pa bo. Sinembargo, pa elimina trans fat completamente for di bo dieta ta impractico y extremadamente dificil, como cu mayoria cuminda ta contene trans fat y nutriente esencial tambe.

Kico pa come ora di come afo
Realidad ta keda cu mayoria hende, un mas cu e otro ta come afo. Mientras cu luganan ‘fastfood’ ta popular pa famianan bay, ta bon pa sa kico ta e opcionnan miho cu otronan riba e menu. Hasta na Subway cu ta wordo propaganda pa ta esun di mas saludabel, bo por sali cu opcionnan menos saludabel (Pan blanco y e monton di dressing agrega). 
Mi a menciona KFC den e articulo aki, como cu nan ta enfoca riba e galiñanan hasa den azeta cu zero trans fat, pues mi t’ey duna un bon opcion di nan menu. Prome cos cu ta bin na nos mente ora pensa di KFC ta galiña ‘deepfry’ cu mansa y vet, sinembargo mester bisa cu opcionnan mas saludabel riba nan menu ta e saladanan di galiña sin dressing y sin croutons combina cu awa y maishi sin manteca entre otro. Un guia cu por sigui na otro restaurantnan tambe. Si tin producto volkoren, scoge eseynan y si tin berdura y fruta tambe (fuentenan rico di fibra).

Sugerencia
Dicon nos no por djis bay bek na tempo cu nos tabata come mas simpel. Ingredientenan natural y simpel, sin diferente sucu of salo agrega y ingredientenan cu nos ni por pronuncia. Ban bek na tempo cu un snack tabata un simpel fruta of berdura of pinda y noot. Pa cuminda grandi ,pisca, carni of galiña cu ta abou na vet.

“Cuida bo curpa, y e lo cuida bo”