Segun añanan ta pasa e cantidad di hende cu ta bay riba dieet ta crece mas y mas. Cu e mercadeo di tur e diferente maneranan pa perde peso, ta mas y mas ta e grupo di hendenan cu ta busca un cu segun nan, ta e miho manera pa baha peso. E ta simpel, dieet no ta funciona pasobra e ta temporario.
Un cos cu ta sigur di tur e tipo di dieet ta, cu mayoria di nan no ta preocupa nan mes cu un formula pa bo baha peso a termino largo, pasobra si esaki tabata e caso, e industria aki lo no tabata uno di biyones di dollar. Nan lo bin cu un dieet, e lo funciona y hende lo scoge esey, uz’e y lo stop di uza nan y sigui cu nan bida ora cu e funciona, pues e compania lo no sigui traha placa. (Mare esaki tabata berdad of no?). Realidad ta cu e ta un negoshi unda cu bo ta poniendo bo salud y bienestar na liña.
Pues e pregunta principal cu bo mester haci ta, cu tanto dieet, tanto experto, tanto buki tocante dieet, dicon tin hende cu no ta perdiendo peso. E problema ta, cu mayoria dieet ta bin cu un plan hopi stricto, casi imposibel pa bo sigui fielmente henter e temporada. Otro motibo ta, cu bo no ta siña como saludabel ora cu bo ta riba dieet y pues ora e plan caba no tin un guia mas di con pa mantene e peso. Tercer motibo ta, cu hopi dieet ta prohibi consumo di algo, manera carbohydrato por ehempel. Realisticamente bisa, bo no por biba pa semper sin consumi esaki, kiermen un dia bo ta bay “relapse”.
“Survival mode”
Hopi biaha mi ta tende hendenan cu ta purbando pa baha peso cu a pesar cu nan ta riba dieet nan no ta baha. E ta zona straño, pero ta netamente ora cu nos ta haci nos maximo esfuerso pa baha di peso, ta e mes momento ey nos curpa tambe ta lucha pa mantene e peso. Ora cu nos bay riba un dieet y baha cantidad di caloria cu nos ta come na un manera diripiente y drastico, nos curpa ta haya un señal di peliger. E ta slow down nos metabolismo pa spaar e cantidad di caloria cu a tuma (survival mode), simplemente pasobra e ta compronde esaki como un peliger pa bo curpa sobrevivi. Y tur locual cu nos curpa ta curpa haci ta mantene nos sano y saludabel pa mas hopi cu e por, tur dia.
Ora cu nos baha e cantidad di caloria cu nos ta tuma den un forma drastico, corda bon cu nos curpa no sa kico nos ta ocupa cun’e. Nos por wel di ta riba un desierto sobreviviendo cu cantidad limita di cuminda etc. Y mester corda cu nos tin miles di añanan di evolucion biologico cu ta duna informa nos curpa pa conserva vet. Djis por si acaso lo ta den un survival mode pa un tempo largo.
Cambio a termino corto
Mayoria hende por mantene un dieet y cambia nan custumber di come pa algun siman of pa un luna (“30 day challenge”), pio hopi biaha e cambionan aki ta externo y ta encera instruccionnan hopi stricto, “come esaki y esaki no”. Claro cu locual cu nos come ta importante. Sinembargo cambia e tipo di cuminda cu nos ta come solamente, no necesariamente ta suficiente pa cambia creencia, custumbernan of comportacion.
Si un dieet ta enfoca solamente riba opcionnan di cuminda y no e pakico, bo lo keda bay bek pa productonan incorecto cual nos salud no ta beneficia di dje. P’esey e ta hopi importante pa busca guia ora di cambio d estilo di bida pa uno mas saludabel. Asina bo ta explora e pakico bo ta come y kico bo tin cu come etc.
Dieet no ta leuk, explora cuminda saludabel si
Tur dieet ta bin cu un lista di locual cu no mag di come, cual mester evita si bo kier ta exitoso. Esaki ta rekeri “willpower”, un habilidad pa mantene bo mes na reglanan, esaki ta haci cu e no ta leuk. No tin ningun hende cu ta contento riba un dieet, pasobra tur locual cu mag di come ta controla, y e dieet ta controla bida di e persona siguiendo e, te dia e caba, of no por mas. E stress aki no ta bon pa bo curpa y por crea un situacion cu e cantidad di cortisol y adrenalina den nos curpa ta subi, cual ta baha e potencial pa nos curpa kima caloria. “Si bo no ta disfruta di locual cu bo ta come, bahamento di peso lo ta un bataya, cual e ta pa hopi.”
