Salud di curason ta importante y ta wordo influencia directamente door di nos estilo di bida. Den conexion cu dia Dia Mundial di Curason, na luna di september e enfoke ta riba salud di e curason. Teniendo esaki na cuenta mi kier a mustra riba e importancia di comemento bon y movecion pa un curason saludabel.
Actividad fisico
Prome mi kier a enfoca un poco riba e importancia d actividad fisico. Tin diferente tipo di ehercicio cu por wordo enfocando riba diferente parti di nos curpa. Ehercicio cu ta aumenta bo halamento di rosea y bo ritmo cardiaco ta promove salud di curason den diferente manera. Curason ta un musculo, y manera cualkier otro musculo, e ta reacciona bon na ehercicio. Asina e ta keda bira mas miho den e proceso di pomp sanger y transporta oxigeno. Banda di esaki bo ta kima caloria tambe mientras cu bo ta haci ehercicio cual por yuda cu bo esfuerso pa perde peso, curpa saludabel y peso saludabel. Ehercicio tambe ta mantene presion di sanger bou di control y ta relaha stress, manteniendo presion di sanger y nivel di stress na ordo ta bon pa salud di bo curason.
Nutricion pa bo curason
Locual cu bo ta come por aumenta e riesgo pa bo sufri di malesa di curason, sinembargo nos tur sa con dificil e ta pa cambia custumber di come algo. Sea cu ta hopi aña bo tin ta come algo cu ta malo pa bo curpa of bo ta come generalmente bon y kier mas informacion di locual cu ta bon pa bo curason mi ta yuda bo cu algun tip. Pa biba saludabel ta mas facil cu bo ta kere, e ta cambionan/alternativa chikito gradualmente cu ta na final ta bira hopi.
Porcion cuminda
E cantidad cu bo ta come y locual cu bo ta come ta mes importante. Uzando un tayo grandi y yenando esaki completamente. E comemento aki hopi biaha aki ta compaña cu e sentimento di sinti hopi yen ora cu caba, cual ta indica hopi biaha cu bo a come mucho caloria. Cumindanan den restaurant hopi biaha ta hopi mas cu bo mester! Pone atencion na esaki.
Uza tayo chikito y pone tur cos riba e tayo ey, sin cu mester stapel cuminda riba otro ta yuda come den porcion controla. Poniendo atencion na locual cu bo ta come ta yuda bo reconoce señal cu bo ta yen pa bo stop di come. Si bo preocupacion ta pa no benta cuminda afo, e ora saca menos y ora esey caba, si bo ta sinti cu bo kier mas bo ta pone un poco mas riba bo tayo.
Ideal pa controla porcion ta si tur hende por a pisa/midi nan cuminda, sinembargo esaki no ta algo realistico pa tur hende pues un recomendacion hopi facil mi kier ilustra riba e potret di e tayo hunto cu e articulo aki.
Mas fruta y berdura
Comiendo mas fruta y berdura casi automaticamente ta haci cu bo ta come menos cuminda cu ta yen vet, salo of sucu agrega. Fruta y berdura ta bon opcion pa snack entre cumindanan durante dia, ta yena cu bon fibra y abou na caloria.
Producto Integral
Cumindanan cu ta integral ta bon fuente di fibra y otro nutriente cu ta hunga un rol den regula presion di sanger. Bo por aumenta bo consumo di fibra door di uza productonan integral y door di cambia tur producto refina pa integral. Aros Blanco – Whole Wheat, Pasta Blanco – Pasta Whole Wheat, Pan Blanco – Pan Whole Wheat. Asina tin hariña, cereal y papa tambe cu ta integral.
Limita vet no saludabel
Limita consumo trans vet y vet satura ta un paso hopi importante pa reduci bo chensnan pa tin Cholesterol halto. Cholesterol halto ta aumenta e riesgo pa bo haya ataca di curason y stroke.
E miho manera pa limita consumo di e vetnan malo aki ta door di uza menos manteca y margarina, tambe door di uza carni cu menos vet of corta e vetnan afo. Tambe por tene cuenta pa uza productonan ‘low fat’, controla label di chips y buscuchi etc. Y ora cu bo ta bay uza vet, uza di oleifi, vegetal of otronan cu ta procedente di noot, awacati, pisca, flaxseed etc.
Reduci salo
Comemento di hopi salo ta contribui na presion halto, un factor di riesgo pa malesanan cardiovascular. Pues reduciendo bo consumo di salo ta un parti importante pa tin un curason saludabel. Un cuchara di te di salo ta tur locual cu bo mester pa dia (persona saludabel) Pa esunnan cu ta sufri di presion of diabetes, mita di esey.
Reduccion di salo for di bo cuminda ta facil si bo ta cuminsa na stop di uza esun cu bo mes ta agrega den bo cuminda na mesa. Sinembargo, hopi di e salo cu nos ta consumi, ta bin di cuminda procesa of den bleki. Pues comiendo cuminda fresco y cushinando bo mes, por reduci e cantidad di salo cu bo ta consumi na un manera mas efectivo. P.S. e bouillon, soy saus, ketchup, complete seasoning, tur tin salo!.
Recomendacion
Awo mi ta spera cu mi a duna bo suficiente tip y inspiracion pa come mas saludabel, pues awo solamente falta pa bo aplica esakinan den bo proximo cuminda of trip pa supermercado. Mi no ta kere den dieet y trahamento di un mealplan pa bo come tur dia mesun cos. Pero siguiendo e tipnan aki sigur bo lo sinti mas miho y lo tin mas energia. Corda cu comemento varia ta importante pa percura cu bo ta haya diferente vitamina esencial pa bon funcionamento di bo curpa.
Tip: Mantene cuminda saludabel den bo frishider / cashi y lo bo come mas saludabel.
