Nadien Phillip: Come local y segun temporada ta duna mas balor nutritivo na consumido

Come cuminda segun tradicion local, produci local y segun temporada ta mas miho pa bo cu bo ta kere. Esaki no ta un secreto cu a sali na cla awo, sino algo cu nos grandinan a haci, y nos tur ta di acuerdo cu antes hende tabata mas saludabel, y no tabatin mes tanto problema di salud relaciona cu peso.

“Awendia hopi coki y personanan educa den e ramo di salud ta recomenda hende pa come a base di temporada, of pa inclui cuminda den bo dieta cu ta wordo produci den e mesun periodo di aña cu bo ta aden. Pa come a base di temporada ta importante y tin beneficio pa bo salud, planeta y cartera,” Gewichtsconsulent Nadien Phillip ta informa den e articulo aki. Aunke cu e cambio di temperatura no ta drastico aki na Aruba, nos tambe ta pasa den cambio di temporada. Na prome instante pa come a base di temporada ta mustra simpel, pues bo a come locual cu ta wordo cosecha den e temporada cu bo ta aden. Esey ta berdad, pero tin hopi mas cu esey, tin beneficio real na come locual cu ta wordo produci den e temporada cu ta nan momento.

Beneficionan

Generalmente e ta mas barata tambe si come producto cu ta wordo cosecha den e temporada cu bo ta aden, como cu e ta costa menos pa produci nan, y nan ta obtenibel na un cantidad mas halto. Algo cu hopi biaha no ta tene cuenta cun’e ora cu ta haci compras. Sinembargo e miho consecuencia di come segun tempo rasa ta cu bo ta haya un producto cu ta smaak mucho mas miho y mas saludabel. E cuminda ta wordo produci cerca di bo, kisas na unda bo ta biba mes (local), cual ta haci cu e no ta pasa den diferente transportacion prome cu e yega cerca bo, menos kimico of niun ta wordo uza pa mantene e producto bon (tur cu ta afecta sabor di e producto). Tur e informacion aki ta contrario pa fruta cu ta produci for di nan temporada, Diferente maniobra ta wordo haci cu nan den produccion, pio tambe nan ta wordo importa for di otro banda di mundo tin ora, generalmente piki prome cu ta ora di cosecha nan, pa nan por sobrevivi e trip a yega den e supermercado cerca di bo. Resultado di esaki ta cu nan ta mucho mas caro. Sinembargo nunca e garantia t’ey 100% cu bo ta haya un producto cu realmente ta cosecha den su abundancia, si cumpra local y a base di temporada. Un compania por piki e producto prome cu tempo y warda esey den su deposito. Pero cumprando local bo tin miho chens cu e ta mas fresco y na mes momento bo ta sostene agricultura local.

U otro gran beneficio di come a base di temporada ta cu bo ta come un variedad di cuminda. Come varia ta un di e prome consehonan pa comemento saludabel, corda riba e diferente vitamina y mineralnan cu tin cu ta esencial pa bon funcionamento di bo curpa. Awendia nos tin e suerte cu henter aña largo supermercado ta yena cu diferente fruta cu berdura henter aña largo. Esaki ta nifica cu nos por come varia, sinembargo esey no ta e caso. Persona tin e tendencia di cumpra e mesun fruta y berdura tur ora. Ocasionalmente ta sosode si, cu tin un producto cu bo tin hopi tempo sin mira y como cu e ta wordo produci den e temporada, bo ta cumpra  y come. Si come segun temporada, ta come tur temporada un diferente grupo di cuminda y e ta permiti bo experimenta y conoce otro producto.

Reconoce producto, pone atencion na cambio

Si bo no ta familiar cu locual cu ta wordo produci segun temporada of local e no ta dificil. Simplemente tira un bista den supermercado na e costo pa producto y segun aña ta pasa con e prijs ta cambia, wak cua producto tin na abundancia, wak rond na kico agricultornan local ta produciendo, wak si bo ta reconoce con un producto ta mustra y si bo ta corda cu den otro temporada e ta mustra mas miho etc. Riba internet tambe tin diferente guia pa come segun temporada cu ta yuda bo come mas di locual ta wordo produci e temporada cu bo ta aden.

Antes nos grandinan no tabatin e luho di transportacion facil manera cu tin awo. E tempo ey ta locual cu tin den e temporada, ta esey ta come, niun hende e tempo ey a pensa cu bo por haya peach den winter por ehempel.

Esaki no kiermen cu awo bo mester bay come den temporada so, tur cos tin di haber cu e conocemento di locual ta beneficioso pa bo salud, y e momento cu e producto ta obtenibel na un miho prijs. E idea ta pa bo ta consciente pa come varia y pensa riba e diferente opcionnan cu tin rond di cuminda.