Pa varios dia Bon Dia Aruba ta purbando pa haya mas informacion riba e noticia di 24ora.com cu tin dos hotel nobo na caminda pa San Nicolas.
Den e articulo ey no ta menciona cua cadena internacional lo bin cu e hotelnan pa Aruba. Locual si nan ta bisa a base di entrevista cu minister di Infrastructura Benny Sevinger, cu si tur cos ta bay bon, ya den un par di dianan e tereno pa un hotel lo wordo traspasa na e grupo di desaroyado.
Bon Dia Aruba ta keda riba e topico aki como cu te awor no tabatin niun indicacion cu gobierno ta den un fase basta leu cu dos cadena di hotel pa San Nicolas. Tur dia nos ta haya un gran cantidad di comunicadonan for di gobierno. Pero riba e desaroyo grandi aki cu impacto grandi pa e area, te awor gobierno no a comunica nada.
Nos redaccion a purba di haya informacion di e departamento di infrastructura DIP como esun cu ta encarga di evalua peticion pa haya tereno comercial y e otorgamento. E directora di DIP sra. Isabel Dammers a bisa nos riba diamars cu nan no tin informacion riba e hotelnan ainda y cu lo check esaki. Ayera el a indica cu nos mester tuma contacto cu minister Sevinger como cu e ta dispuesto pa duna e informacion. Sinembargo pa Bon Dia Aruba e no ta asina facil pa haya contacto cu e minister aki concerni, manera cu 24ora.com a base di experiencia den tur e añanan. Motibonan no ta wordo duna.
Bon Dia Aruba lo haci su best e siman aki pa busca mas informacion y tambe ken ta tras di e dos proyectonan di hotel. Sinembargo nos ta keda riba e topico aki pa asina informa pueblo mas profundo riba e hotelnan, di cua cadena nan ta, con grandi y kico e impacto ta pa e area.
