Nacionnan Uni a organisa un evento grandi cual a bira e prome di su tipo aki na Aruba cu a presenta 20 orador di caliber riba tema di sostenibilidad riba e prome dia. Aki por lesa e relato completo cu gobierno a manda prensa:
E prome dia di Conferencia P3a (Public Private Partnership (PPP) Conference Aruba) bou co-auspicio di Nacionnan Uni (NU) y Reino a trece un total di 20 orador den sesionnan durante mainta y atardi. P3a Conference, ‘From Ideas to Reality’, a inicia cu discurso di Prome Minister Mike Eman, repasando e trabou di Aruba riba tereno di sostenibilidad.
E conferencia historico aki ta muestra cu Aruba y den cooperacion cu su partnernan internacional a sa di enfrenta retonan cu islanan rond di mundo tin cu ta tipico di nacionnan isleño. E manera cu Aruba a soluciona y maneha entre otro, retonan energetico y su necesidadnan infrastructural, awe a bira un ehempel, den un conferencia co-auspicia pa Nacionnan Uni, pa un cantidad grandi di nacionnan rond mundo.
Den e prome parti di programa, despues di e discurso di Prome Minister Eman, a sigui un presentacion interesante di Sub-secretario General di Nacionnan Uni, Gyan Chandra Acharya, sigui pa discursonan di representante permanente di Hulanda na Nacionnan Uni Karel Oosterom, Jagdish Koonjul (Embahador Permanente di Mauritius na Nacionnan Uni); Richard Blewitt (UN Resident Coordinator) y dr. Glenn Thode (Rector di Universidad di Aruba).
Papiando cu pasion, Prome Minister Eman a conta e storia di Aruba cu ta un inspiracion pa paisnan chikito mescos cu Aruba, cualnan no ta esnan cu ta causa e problema, pero si ta wordo afecta grandemente. Cu hopi orguyo e mandatario a splica e caminda cu ta canando pa yega na un independencia total di recursonan tradicional pa produccion di energia, pero tambe e maneho di sostenibilidad promoviendo por ehempel agricultura. Tambe, pa logra un miho sociedad pa un y tur, sector priva mester traha hunto cu sector publico. Ta di e forma aki a nace e formula di ‘Private Public Partnership’ cu ta e base di e conferencia internacional P3a tumando luga na Aruba te cu diahuebs awo.
Tambe a bini dilanti den e sesion di mainta con Aruba ta contribui pa promove e pensamento berde, creando un Green Faculty, cual ta wordo incorpora den Universidad di Aruba, cu ta bou guia di dr. Glenn Thodé.
E P3a Conference ta uno ambicioso cu a wordo hinca den otro door di un team di Aruba, di Ministerio di Asuntonan General, cu apoyo di tanto Nacionnan Uni como Reino Hulandes. Ta door di e combinacion aki a logra trece oradornan cu a trece mensahenan importante, pa e nacionnan isleño di mundo, unda cu ta mustra e importancia pa traha pa busca solucionnan local pa problemanan local, manera e co-fundador di BlueRise (di Hulanda) Diego Acevedo a trece dilanti cu tabata dirigi riba e importancia di lama pa existencia y economia, di mundo. Lama ta masha importante, principalmente pa islanan chikito. A enfoca riba comparti y bini cu e miho practicanan pa un PPP responsabel, entre otro den areanan di pesca sostenibel y proteccion di recursonan di oceano y marino. Den e sesion aki tabatin oradornan elocuente manera Diego Acevedo (Co-fundador di BlueRise); Charlotte Vick (Director di Partnership, Mission Blue); Paul Holthus (Presidente Fundador y CEO di World Ocean Council); Deujen Mungur (Manager Ocean Economy di Maritius Board of Investment); y Alessio Giardino (Seniro Coastal Engineer Deltares).
Den oranan di merdia a trata un tema interesante pa e audiencia local, cu ta energia renobabel, un tema cu Aruba tin basta experiencia den dje. E prome orador pa hiba palabra tabata Franklin Hoevertsz Managing Director di Utilities Aruba NV. Atardi Hoevertsz a wordo compaña pa oradornan Michele Greca (Ascot); Hector Mendoza (North Latam Phillips Lighting Solutions); Jennifer DeCesaro (IRENA); Ibrahim Nashid (Islanan Maldiva); Nathalie de Vos (TNO Caribe); Thomas Siebenbrunner (Swimsol) y Paul Makumbe (Subergise).
E conferencia ta conta cu presencia den gran mayoria representantenan di nacionnan isleño cu ta wordo grandemente afecta pa e aumento di nivel di lama y instancianan cu cual nan por forma un partnership pa yega na solucionnan sostenibel. P3A ta un conferencia historico pa Aruba pa motibo cu e ta un iniciativa di Nacionnan Uni pa yuda otro islanan rond mundo pa por enfrenta retonan cu Aruba a demostra di por supera. Un di nan ta adaptacion di e sistema di PPP pa por financia proyectonan sostenibel na beneficio riba termino largo di nan Pais. Esaki ta e prome biaha cu Nacionnan Uni ta organisa un evento di e magnitud aki na Aruba
