Segun e programa Nieuwsuur di NOS, Nacionnan Uni a pidi gobierno Hulandes pa clarifica e incidente di expulsion di dos disidente Cubano di nan propio pais, cu colaboracion di e compania nacional di aviacion di Aruba. E Cubanonan a declara cu nan a ser expulsa di manera forzoso for di nan pais pa gobierno Cubano.
Nieuwsuur a logra drenta den contacto cu e dos personanan. A logra haya tambe documento cu ta indica cu Aruba Airlines ta den man di un Venezolano y cu esaki ta en pugna cu ley di Aruba, cu ta stipula cu e compania mester tin un Arubano como propietario, segun Nieuwsuur ta expresa. Ademas e regimen Venezolano lo tin lazonan intimo cu e regimen comunista di Cuba y ta indica cu por ta trata di haci uso di e compania di un forma cu ta conveni ambos regimen.
Segun Nieuwsuur, (gobierno di) Hulanda y Aruba a laga sa cu nan ta desea pa Aruba Airlines cumpli miho cu procedimento di siguridad, pero nan no kier comenta riba contenido di e asunto. Segun Aruba, e medio ta comenta, Aruba Airlines ta cumpli cu tur rekisito legal, pero cu despues di varios peticion gobierno di Aruba no a fundamenta e opinion aki.
Cuba ta desmenti, den entrevista cu Nieuwsuur, cu ta trata di expulsion forzoso. Di su banda, Aruba Airlines ta mantene un linea cu ta comparabel cu esun di gobierno Cubano. E personanan lo a biaha boluntariamente y no ta toca e compania di aviacion ningun reproche, a laga Nieuwsuur sa. Sin embargo, e medio ta bisa tambe di ta den poder di documento di vuelo y copia di paspoort cu ta apoya loke e disidentenan ta conta. Gobierno Cubano y Aruba Airlines no tabata kier a elabora riba esaki pa Nieuwsuur.
Den e programa di Nieuwsuur ayera na television Hulandes tin un entrevista cu e disidente Cubano Eliecer Gongora Izaguirre cu ta conta con un expulsion cu colaboracion di Aruba Airlines a daña su bida. E ta añadi: “Si mi mester bolbe, nan ta mata mi.”
Nacionnan Uni a tuma e keho di Eliecer Gongora na serio y ta investigando simultaneamente un keho similar di otro Cubano. Daniel Llorente Miranda ta conta cu na mei pasa gobierno Cubano a expulsa su persona riba un vuelo di Aruba Airlines.
Structura di propiedad ilegal
Den nan investigacion Nieuwsuur a bin topa cu documento cu ta duna fuerte indicacion di un structura di propiedad ilegal di Aruba Airlines. “Ley di Aruba ta prescribi cu e compania di aviacion mester ta den man di un Arubano. Esey ta di importancia pa preveni influencia no desea di exterior y pa reforsa e posicion autonomo di e isla. Pero den e caso aki ta resulta cu via un holding e accionnan ta den man di Esteban Valles, un persona naci na Venezuela y cu tambe tin nacionalidad Mericano.”
Segun ley, Nieuwsuur ta comenta, e decisionnan tocante operacion diario mester ta tuma na Aruba. En realidad por lo menos parcialmente esey ta sucede desde e capital Venezolano, Caracas.
Pablo Mendes de Leon, profesor den derecho di aviacion na Universidad di Leiden, a studia e documentonan cu Nieuwsuur a logra haya. E ta haya esaki un “schimmige constructie” y ta constata cu e propietario y e poder di decision di Aruba Airlines enberdad no ta di Aruba.
Esey pa e medio Hulandes, ta pone e keho di Gongora y Llorente den un luz diferente. E regimennan di Cuba y Venezuela tin amistad y ta duna otro tur sorto di fabor. Ta imaginabel anto, cu e regimen Venezolano ta haci uso di Aruba Airlines den un intercambio di fabor cu Cuba, Nieuwsuur ta conclui.
Oficina di Alto Comisario pa Derecho Humano di ONU na Ginebra a pidi aclaracion di gobierno di Hulanda, di Cuba y di Aruba. Tambe a comunica cu Aruba Airlines. Aunke Aruba ta un pais autonomo dentro di Reino, ta Reino ta responsabel riba tereno di (tratado di) aviacion y asunto exterior. Segun Nieuwsuur, e reportero special pa ONU ta e Frances Michel Forst. E no kier a duna comentario na Nieuwsuur pasobra e proceso ta canando ainda.
Nota di redaccion:
Bon Dia Aruba a reporta tocante e asunto aki dia 7 di juli 2019. Na e momento ey e denuncianan haci tabata tocante di 35 persona expulsa di e manera aki di Cuba y den cual tabata denuncia tambe e papel di Aruba Airlines. No ta conoci cuanto di nan a sali di Cuba cu Aruba Airlines.
