(JamaicaObserver) – Nacionnan Uni a reacciona ayera riba e expresion di presidente Donald Trump, den cual el a describi nacionnan Africano y Haiti como shithole countries bisando cu esaki ta chocante y bergonsoso, y racista.

“Si e ta confirma, esakinan ta comentario chocante y bergonsoso” di e Presidente di Estadonan Uni, pero no tin otro palabra cu un hende por uza cu no ta racista, asina Rupert Colville, vocero di e oficina di Derecho Humano di Nacionnan Uni a conta reporteronan na Giniebra, Suiza.

Colville tabata referi na e comentarionan cu Trump supuestamente a haci durante un reunion diahuebs ultimo cu legisladonan tocante reforma di inmigracion, demandando pa haya sa ta pakico Merca lo mester acepta ciudadano di shithole countries.

E comentario, reporta prome pa The Washington Post, a lanta rabia cerca Democrata y Republicanonan y a rebiba pregunta tocante Trump su tendencia di haci observacion di contenido racial.

“Bo no por despacha pais y continentenan completo como  s…holes di cual henter e poblacion no ta blanco, y ‘pesey lo no ta bonbini,” Colville a bisa.

El a tuma nota tambe di Trump su sugerencia cu Merca lo mester yama bonbini na inmigrante di luganan manera Noruega, cu un poblacion casi exclusivamente blanco, na luga di paisnan Africano y Haiti. “E comentario positivo di Noruega ta laga e sentimento ey bao di Trump bon cla”, segun Colville.
“Manera e comentarionan anterior cu ta incrimina Mexicano y Musulman, e propuestanan di maneho cu ta ataca gruponan completo a base di  nacionalidad o religion, y e poco gana pa condena e accionnan anti-Semitico y racista di e supremacistanan blanco na Charlottesville, tur ta bay contra e balornan universal cu mundo a lucha asina duro pa establece desde Segunda guera Mundial”, el a declara.

“Esaki no ta djis un storia tocante lenguahe vulgar. Ta trata di habri e porta mas hancho ainda pa e banda mas malo di humanidad, ta trata di duna balor y curasha racismo y xenofobia cu potencialmente lo kibra y destrui bida di miles di hende. Esaki kisas ta e consecuencia mas dañino y peligroso di e tipo di comentario aki haci pa un figura politico mayor”, el a añadi