(AP) – Nacionnan Uni a saca 125 miyon dollar for di su fondo di alivio pa emergencia riba diamars pa yuda e operacionnan humanitario sin suficiente fondo den 14 pais rond di mundo, citando cu e necesidadnan ta aumentando rapidamente.
Afghanistan y Yemen ta e 2 recipientenan top di e lista, cu cada un ricibiendo 20 miyon dollar, sigui pa Burkina Faso y Myanmar cu lo ricibi 9 miyon cada un y Mali, Haiti y Venezuela cu lo ricibi 8 miyon dollar cada un. U.N Central Emergency Relief Fund tambe lo provee 6.5 miyon dollar pa ambos Central African Republic y Mozambique, 6 miyon na Cameroon y teritorionan di Palestina y 4 miyon dollar na Malawi.
E fondo tambe lo provee 8 miyon dollar pa duna sosten na operacionnan di refugiadonan na Bangladesh y 6 miyon dollar pa refugiadonan na Uganda. “E ta un realidad cruel cu den varios operacion humanitario, e agencianan ta purbando di traha cu hopi tiki fondo na un momento unda e necesidadnan ta pidi pa e fondo aumenta,” hefe humanitario di Nacionnan Uni a bisa na momento di anuncia e alocacionnan nobo.
El a splica cu e fondo aki por yuda yena algun buraco y salba bidanan dank na e generosidad di un rango amplio di donadornan, “pero nos mester pa e donadornan individual tambe cuminsa duna mas, esaki ta un fondo di tur hende pa tur hende.” E aña aki, Nacionnan Uni a apela pa mas di 55 biyon dollar, pa asina por yuda 250 miyon persona afecta pa conflicto, clima, desasternan natural, brote di malesanan y otro cisisnan. Sinembargo te cu awo, e apelacion a genera 16 biyon dollar so, cual ta bao di 30 porciento di e fondonan cu mester.
E 125 miyon dollar di Central Emergency Relief Fund ta trece e cantidad total aloca pa e emergencianan sin fondo e aña aki na mas di 270 miyon dollar, cual ta e cantidad mas halto desde cu e fondo a keda estableci den aña 2005. E oficina humanitario di Nacionnan Uni a bisa cu esaki ta refelha e “necesidadnan humanitario cu ta aumentando rapidamente y e hecho cu fondonan regular di donadornan no ta aumentando na e mesun velocidad.”
El a señala tambe na diamars su anuncio di Nacionnan Uni su World Food Program, cual a anuncia cu nan lo mester recorta 2 miyon persona den Afghanistan di nan asistencia di cuminda e luna aki a causa di falta di fondo. Esaki ta trece e cantidad total di personanan di Afghanistan cu a perde e sosten aki na 10 miyon. Den e lunanan binidero, World Food Program a anuncia cu nan lo por provee cuminda na solamente 3 miyon persona. E agencia basa na Roma a bisa cu pa por sigui e trabao, nan ta rekeri 1 biyon dollar. E 1 biyon dollar aki ta e cantidad di fondo necesario pa por yega na e 21 miyon persona den necesidad pa e siguiente 6 lunanan.
