(AP) – Nacionnan Arabe poderoso riba diasabra a rechasa President Mericano Donald Trump su sugerencia pa reloca Palestinonan for di Gaza na bisiña Egipto y Jordan.
Egipto, Jordan, Saudi Arabia, United Arab Emirates, Qatar, Palestininan Authority y Arab League a publica un declaracion conhunto rechasando cualkier plan pa saca Palestinonan for di nan teritorio na Gaza y West Bank.
Trump a trece dilanti e idea aki luna pasa, bisando cu e lo urgi e lidernan di Jordan y Egipto acepta Gaza su poblacion cu awo ta en gran parte sin cas, pa asina “nos por limpia e cos ey.” El a agrega cu e relocacion di Gaza su poblacion di 2.3 miyon lo ta temporario of pa termino largo. Algun oficial di Israel tambe a trece dilanti e idea aki den comienso di e guera. “E ta literalmente un sitio di demolicion actualmente,” Trump a bisa, refiriendo na e destruccion amplio causa pa Israel su guera di 15 luna cu Hamas, awo pausa pa un alto al fuego fragil.
E declaracion Arabe a adverti cu e tipo di plan aki “ta menasa e region su stabilidad, poniendo den riesgo e expansion di conflicto y posibilidad pa pas y coexistencia entre su personanan.”
E declaracion ta bini despues di un reunion na Cairo di diplomaticonan top na Egipto, Jordan, Saudi Arabia, United Arab Emirates y Qatar ademas di Hussein al-Sheikh, un oficial Palestino cu tin e funcion di coneccion principal cu Israel y hefe di Arab League Ahmed Aboul Gheit.
Nan a bisa cu nan tabata anticipa traha cu administracion Trump pa “yega un pas husto y comprensivo na Medio Oriente, basa riba un solucion di dos estado,” segun e declaracion.
Nan a haci yamado na e comunidad internacional pa yuda “plania y implementa” un plan di reconstruccion pa Gaza pa asina garantisa cu e Palestinonan keda riba nan tera.
E president di Egipto President Abdel Fattah el-Sissi a rechasa Trump su sugerencia na un conferencia di prensa siman pasa, bisando cu e transferencia di Palestinonan “no por keda tolera ni permiti. E solucion na e problema aki ta e solucion di dos estado. E ta e establecimento di un estado Palestino,” el a comenta. “E solucion no ta di saca e pueblo Palestino for di su tera. No.”
Jordan su minister di exterior Ayman Safadi tambe a bisa cu su pais su oposicion contra Trump su idea ta “firme.”
El-Sissi su oficina a bisa cu e lider di Egipto a ricibi un yamada di Trump riba diasabra. El a describi e yamada como uno “positivo,” pero no a menciona Trump su sugerencia.
El a enfatisa tambe e importancia di logra un “pas permanente” den e region, agregando cu e comunidad internacional ta conta riba Trump su habilidadnan pa yega na un acuerdo di pas historico y permanente” den Medio Oriente, segun e declaracion di Egipto.
Egipto y Jordan conhuntamente cu e Palestinonan ta preocupa cu Israel nunca lo permiti nan regresa Gaza asina cu nan sali. Egipto y Jordan tambe tin preocupacion tocante e impacto cu e fluho di refugiadonan aki lo por tin riba nan economia cu ya caba ta den problema ademas di e stabilidad di nan gobierno.
Jordan ya caba ta cas di mas di 2 miyon Palestino. Egipto a adverti implacionnan den su seguridad si transferi cantidadnan grandi di Palestino na Egipto su Sinai Peninsula, cual ta na frontera cu Gaza.
Ambos pais tabata e prome cu a yega paz cu Israel pero nan a sostene tambe e creacion di un estado Palestino den West Bank, Gaza y parti este di Jerusalem, teritorionan cu Israel a captura den e guera di Medio Oriente 1967.
